مەسرور بارزانی و داواکاری گشتیی هۆڵەندا جینۆسایدەکانی دژی گەلی کوردیان تاوتوێ کرد
پێنجشەممە، 24-04-2025، مەسرور بارزانی، سەرۆکی حکوومەتی هەرێمی کوردستان، پێشوازیی لە سایمۆن مینکس، داواکاری گشتیی هۆڵەندا بۆ بەرەنگاربوونەوەی تیرۆر و توندڕەوی و تاوانە نێودەوڵەتییەکان کرد.
حکوومەتی هەرێمی کوردستان لە ڕاگەیەنراوێکدا ئەوەی خستووەتە ڕوو، سەرۆک وەزیران مەسرور بارزانی "سوپاسی سایمۆن مینکسی کرد کە بۆ چەندین ساڵ کاری لەسەر دۆسییەکانی جێنۆساید و تیرۆر کردووە، لەوانە بەکارهێنانی چەکی کیمیایی لەلایەن ڕژێمی پێشووی عێراق و تاوانەکانی تیرۆریستانی داعش بەرامبەر ئێزیدییەکان."
ئاماژە بەوەش دراوە، سەرۆک وەزیرانی هەرێمی کوردستان هەروەها کار و هەوڵەکانی سایمۆن مینکس ی لەپێناو بەدیهێنانی دادپەروەری بۆ قوربانیيانی ئەو تاوانانە، بەرز نرخاند.
لە بەشێکی دیکەی دیدارەکەدا، باس لە مێژووی تاوانەکانی جێنۆساید لە کوردستان و عێراق و پێویستی بەسزاگەیاندنی تاوانباران و هێنانەکایەی دادپەروەری کرا.