نێچیرڤان بارزانی و نێردەی یەکێتیی ئەورووپا، دۆخی سووریا و ناوچه‌کەیان تاوتوێ کرد
سێشەممە، 29ـی نیسانی 2025، لە ڕاگەیەندراوێکدا سەرۆکایەتیی هەرێم ڕایگەیاند، نێچیرڤان بارزانی، سەرۆکی هەرێمی کوردستان، لەگەڵ باڵیۆز تۆماس سەیلەر، سەرۆکی نێرده‌ی یەکێتیی ئەورووپا لە عێراق و شاندی یاوەری کۆبووەوە.
لە ڕاگەیەندراوەکەدا هاتووە؛ لە کۆبوونه‌وه‌که‌دا پەیوەندییەکانی یەکێتیی ئەورووپا له‌گه‌ڵ هەرێمی کوردستان و بەهێزکردنی هاوکاری و هەماهەنگیی هاوبەش تاوتوێ کران، هەروەها سەبارەت بە بارودۆخی سیاسی و ئابووری لە عێراق و ناوچەکە، بیروڕایان گۆڕییه‌وه.
نێچیرڤان بارزانی، جه‌ختی له‌سه‌ر گرنگیی ڕۆڵی یەکێتیی ئەورووپا لە پشتگیریی سەقامگیری و بەردەوامیی بەهێزکردنی پەیوەندییەکان لەگەڵ عێراق و هەرێمی کوردستان کرده‌وه، به‌تایبه‌تی لە بوارەکانی گەشەپێدان، مافەکانی مرۆڤ و هاوکاریی ئابووری و کەلتووریدا.
لای خۆیەوە، باڵیۆز تۆماس سەیلەر، پابه‌ندیی یه‌کێتیی ئه‌ورووپای به به‌رده‌وامیی پشتگیریی له عێراق و هه‌رێمی کوردستان دووپات کرده‌وه، هه‌روه‌ها سوپاس و پێزانینی بۆ ڕۆڵی هەرێمی کوردستان لە چەسپاندنی سەقامگیری و پێکەوەژیانی ئاشتییانە دەربڕی و خواستی یەکێتیی ئەورووپای بۆ بره‌ودان بە بوارەکانی هاوکاریی لەگەڵ هەرێمی کوردستاندا نیشان دا.
دۆخی سووریا و ناوچه‌که به‌گشتی، ته‌وه‌رێکی دیکه‌ی کۆبوونه‌وه‌که بوو.
