شاندێکی بەڕێوەبەرایەتیی خۆسەر لە دیمەشقە
ئەمڕۆ شەممە، 31-05-2025، شاندێکی بەڕێوەبەرایەتیی خۆسەری ڕۆژئاوای کوردستان بۆ دانوستان لەگەڵ بەرپرسانی حکوومەتی نوێی سووریا، گەیشتە دیمەشق .
شاندەکە لە (فەوزە یوسف، عەبد حامد مەهباش، ئەحمەد یوسف، سەنحەریب بەرسووم، سۆزدار حاجی، مەریەم ئیبراهیم و یاسر سلێمان) کە نوێنەرایەتیی هەموو پێکهاتەکانی ڕۆژئاوای کوردستان دەکەن، پێک دێت.
بە گوێرەی زانیارییەکانی کوردستان24، شاندەکە گفتوگۆ لەبارەی چۆنییەتی تێکەڵکردنی دامودەزگاکانی بەڕێوەبەرایەتیی خۆسەر لەنێو حکوومەتی نوێی سووریا و جێبەجێکردنی ڕێککەوتنەکەی نێوان مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) و ئەحمەد شەرع، سەرۆکی قۆناغی ڕاگوزەری سووریا دەکەن.
پێشتر عەبد مەهباش، ئەندامی شاندەکە بە کوردستان24ـی ڕاگەیاندبوو، شاندەکەی بەڕێوەبەرایەتیی خۆسەر، جیاوازە لەو شاندە هاوبەشەی لە کۆنفرانسی یەکڕیزی و یەکهەڵوێستیی کوردی لە قامشلۆ، پێک هێنراوە.
ڕاگەیاندنی ڕێککەوتنی عەبدی و شەرع
ئێوارەی ڕۆژی دووشەممە، 10-03-2025، مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) و ئەحمەد شەرع، سەرۆکی قۆناغی ڕاگوزەری سووریا، ڕێککەوتنێکی هەشت خاڵییان ئیمزا کرد.
ئەو خاڵانەی ڕێککەوتنیان لەسەر کراوە:
1- گەرەنتیکردنی مافی هەموو سوورییەکان لە نوێنەرایەتی و بەشداریی لە پرۆسەی سیاسیدا و هەموو دامەزراوەکانی دەوڵەت لەسەر بنەمای لێهاتوویی بێ گوێدانە پاشخانە ئایینی و نەتەوەییەکانیان.
2- کۆمەڵگەی کوردی کۆمەڵگەیەکی ڕەسەنە لە دەوڵەتی سووریا و دەوڵەتی سووریا گەرەنتی مافی هاووڵاتییبوونیان دەکات و هەموو مافە دەستورییەکانیان بۆ دابین دەکات.
3- ڕاگرتنی شەڕ لەنێو هەموو خاکی سووریادا.
4- تێکەڵکردنی هەموو دامەزراوە مەدەنی و سەربازییەکان لە باکووری ڕۆژهەڵاتی سووریا (ڕۆژئاوای کوردستان) لە چوارچێوەی بەڕێوەبەرایەتیی دەوڵەتی سووریا، لەنێویاندا دەروازە سنوورییەکان، فڕۆکەخانە، کێڵگە نەوتی و گازییەکان.
5-گەرەنتی گەڕانەوەی سەرجەم ئاوارە و پەنابەرە سوورییەکان بۆ شارۆچکە و گوندەکانیان و پاراستنیان لە لایەن دەوڵەتی سووریاوە.
6- پشتیوانیی دەوڵەتی سووریا لە ڕووبەڕووبوونەوەی پاشماوەکانی ئەسەد و هەموو ئەو هەڕەشانەی کە مەترسین لەسەر ئاسایش و یەکپارچەیی خاکەکەی.
7-ڕەتکردنەوەی بانگەشەکانی دابەشبوون و ڕق و کینە و هەوڵدان بۆ بڵاوکردنەوەی ئاشووب لە نێوان هەموو پێکهاتەکانی کۆمەڵگەی سووریا دا.
8- لیژنە جێبەجێکارەکان کار و هەوڵ بۆ جێبەجێکردنی ڕێککەوتنەکە دەدەن بە شێوەیەک کە لە کۆتایی ئەم ساڵ تێ نەپەڕێت.
