لە جۆلەمێرگ کاتی وشککردنەوەی سێوە؛ "وەک دەرمانە و خواستی زۆری لەسەرە"
لەگەڵ هاتنی وەرزی پاییزدا، لە ناوچە شاخاوییەکانی جۆلەمێرگی باکووری کوردستان و دەوروبەری، وەرزی کۆکردنەوە و وشککردنەوەی سێو دەست پێدەکات. ئەم بەرهەمە سروشتییە، کە بە شێوەیەکی خۆڕسک لە چیاکاندا دەڕوێت، سەرچاوەیەکی گرنگی داهات و خۆراکی خەڵکی ناوچەکەیە.
ساڵانە لەم کاتەدا، جووتیاران و خەڵکی گوندەکانی دەڤەری گەڤەر و شەمزینان، ڕوو لە چیاکان دەکەن بۆ کۆکردنەوەی ئەم سێوە ترش و تاڵە. دوای کۆکردنەوەی، سێوەکە دەهێنرێتەوە بۆ ناوچە دەشتاییەکان و لەسەر پارچە قوماشی گەورە لەبەر تیشکی خۆردا ڕادەخرێت تا بە تەواوی وشک دەبێتەوە.
ئەم کارە، کە بەشێکە لە کەلەپووری کشتوکاڵی ناوچەکە، نەک هەر بۆ دابینکردنی پێداویستی ماڵەوەیە، بەڵکوو بووەتە سەرچاوەیەکی گرنگی بژێوی بۆ زۆرێک لە خێزانەکان. دوای ئەوەی سێوەکە وشک دەبێتەوە، پاک دەکرێت و لە کیسەدا هەڵدەگیرێت بۆ فرۆشتن.
ئەمڕاح چوڵگی، یەکێک لەو جوتیارانەی کە کاری وشککردنەوەی سێوی کێوی دەکات، باس لەوە دەکات کە ئەم بەرهەمە خواستێکی زۆری لەسەرە و بۆ زۆربەی شارەکانی تورکیا، بەتایبەتی ئیستانبوڵ، هەناردە دەکرێت. ئەو دەڵێت: "سێوی کێوی تەنها خواردن نییە، بەڵکو وەک دەرمانیش بەکاردێت. خەڵکی ناوچەکە لە کۆنەوە بۆ چارەسەری هەندێک نەخۆشی بەکاریان هێناوە و خواردنەوەی شەرەبەتەکەشی زۆر بەسوودە".
پێشتر، ئەم بەرهەمە بە شێوەیەکی بەرچاو کۆنەدەکراوەوە و زۆربەی لەبەر دارەکاندا دەڕزی و لەناودەچوو؛ بەڵام لە چەند ساڵی ڕابردوودا، لە ڕێگەی چەند پرۆژەیەکی بچووکەوە، خەڵک هاندراوە کە سوود لەم بەرهەمە سروشتییە وەربگرن، ئەمەش وایکردووە کە ببێتە کارێکی ئابووریی گرنگ بۆ ناوچەکە.
وشککردنەوەی سێو لە جۆلەمێرگ، نموونەیەکی زیندووی سوودوەرگرتنە لە سامانە سروشتییەکان و پاراستنی کەلەپووری کشتوکاڵی، کە نەوە دوای نەوە لەم ناوچەیەدا پەیڕەو کراوە.