سەعدی پیرە: بۆ پۆستی سەرۆکی پەرلەمان دوو کاندیدمان هەیە
سەعدی ئەحمەد پیرە، ئاماژە بەوە دەکات، نێوانی پارتی دیموکراتی کوردستان و یەکێتیی نیشتمانی کوردستان باشە و هەروەها و کاراکردنەوەی پەرلەمان و پێکهێنانی حکوومەت یەک پاکێجن.
سەعدی پیرە، ئەندامی مەکتەبی سیاسی یەکێتیی نیشتمانی کوردستان ئەمڕۆ چوارشەممە، 17ـی ئەیلوولی 2025، بە کوردستان24ـی ڕاگەیاند: هەرێمی کوردستان پشتیوانی لە پرۆسەی ئاشتی دەکات لە تورکیا و ڕۆژئاوای کوردستان، هەروەها هەڵوێستی هەرێمی کوردستان بەرانبەر رووداوەکانی ناوچەکە دروستبووە، نێوانی پارتی و یەکێتیی باشە.
سەعدی پیرە گوتی: پارتی و یەکێتیی بەبێ یەکتر ناتوانن حکوومەت دروست بکەن، بۆ پێکهێنانی حکوومەت پێویستە هەردوو حزب هاوبەش بن و کاراکردنەوەی پەرلەمان و پێکهێنانی حکوومەت یەک پاکێجن.
سەعدی پیرە گوتیشی: بۆ پۆستی سەرۆکی پەرلەمان هەر یەکە لە، شاڵاو کۆسرەت رەسوڵ و میران محەممەد کاندیدی ئێمەن و دوای شەراکەتمان کردووە لە حکوومەت دا، پێویستە لە پۆستە سەرۆکایەتییەکان و سیادییەکان هاوسەنگی هەبێت.
سەعدی پیرە جەخت لەوە دەکاتەوە، دەبێت لەم مانگە دا پەرلەمان کارابکرێتەوە و داوا دەکەین هاوسەنگی لە دابەشکردنی دەسەڵات لەسەرجەم پۆستەکاندا بکرێت و هیوادارم کابینەی دەیەمی حکوومەتی هەرێمی کوردستان پێش هەڵبژاردنی پەرلەمانی عێراق بکرێت.
