پێنج رێکخراوی داکۆکیکار لە مافەکانی مرۆڤ: لە گوندەکانی کۆبانێ خەڵکی مەدەنی کۆمەڵکوژی کراون
تۆڕی کوردی بۆ مافەکانی مرۆڤ لە سووریا بە هاوبەشی لەگەڵ چوار رێکخراوی دیکەی داکۆکیکار لە مافەکانی مرۆڤ، لە راگەیەندراوێکی هاوبەشی بەپەلەدا ئاشکرایان کردووە، لە 24 کاتژمێری رابردوودا و لە کاتی ئاگربەستدا، لە گوندەکانی دەوروبەری کۆبانێ کۆمەڵکوژیی هاووڵاتیانی مەدەنی کراوە.
بەپێی ئەو راگەیەندراوە هاوبەشەی، ئەمڕۆ دووشەممە 26ـی کانوونی دووەمی 2026، بڵاوکراوەتەوە، گرووپە چەکدارەکانی سەر بە حکوومەتی سووریا، بە چەکی قورس و مامناوەند هێرشیان کردووەتە سەر گوندەکانی خەراب عەشک، شەهربانیە و قاسمییە و لە چەند گوندێکیش هەڵیانکوتاوەتە سەر ماڵی هاووڵاتیانی کورد.
رێکخراوەکان ناسنامەی بەشێک لە قوربانییەکانیان ئاشکرا کردووە، کە سەرجەمیان مەدەنین و لە نێویاندا ژن و منداڵ هەن، ئەمەش ناوەکانیانە:
- فاتمە عوسمان
- جەمیلە ئەحمەد عوسمان
- سۆلاف رەشۆ بۆزان
- جەعفەر محەممەد شێخ بۆزان (منداڵ)
- کچێکی محەممەد شێخ بۆزان (ناوی نەزانراوە)
- سەلوە مەحموود
- سابرین ئەحمەد عەلاوی تەمەن 8 ساڵ
- جودی ئەحمەد عەلاوی تەمەن 14 ساڵ
- محەممەد ئەحمەد عەلاوی تەمەن 10 ساڵ
- ئیبراهیم ئەحمەد عەلاوی تەمەن 5 ساڵ
هەر لە راگەیەندراوەکەدا هاتووە، ئەم کۆمەڵکوژییە لە کاتێکدایە ئاگربەست راگەیەندراوە، هەربۆیە ئەمە پێشێلکارییەکی مەترسیدارە لە بنەما ئەخلاقی و یاساییەکانی ئاگربەست. رێکخراوەکان جەخت دەکەنەوە کە ئەم کردەوانە تاوانی جەنگن و بە بەرنامە ئەنجام دەدرێن.
تۆڕی کوردی و رێکخراوەکانی دیکە (رێکخراوی ماف، لیژنەی کوردی "راسید"، رێکخراوی روانگە و رێکخراوی DAD) داوا دەکەن، دەستبەجێ لیژنەیەکی نێودەوڵەتی و سەربەخۆ بۆ لێکۆڵینەوە پێکبهێندرێت، هاوکات هێرشەکانی سەر کۆبانێ و گوندەکانی رابگیرێن، هەروەها رێگە بە تیمە فریاگوزاری و پزیشکییەکان بدرێت بچنە ناوچەکە و لێپرسینەوە لە ئەنجامدەرانی ئەم کۆمەڵکوژییە بکرێت.