سەرکردەیەکی پلە باڵای پارتی: هیچ رێککەوتنێک لەبارەی پۆستی سەرۆککۆماری عێراق لەگەڵ یەکێتی نەکراوە

سەرکردەیەکی پلە باڵای پارتی دیموکراتی کوردستان دەنگۆی رێککەوتنی پارتی لەگەڵ یەکێتی لەبارەی پۆستی سەرۆککۆماری عێراق رەتدەکاتەوە.

سەرکردەکەی پارتی ئەمڕۆ هەینی 30ی کانوونی دووەمی 2026، بە کوردستان24ی راگەیاند، هیچ رێککەوتنێک لەگەڵ یەکێتی نەکراوە له ‌به‌رانبه‌ر پێدانی پۆستێكى باڵاى حكوومه‌تى هه‌رێمی کوردستان، یه‌كێتی پۆستى سه‌رۆككۆمار بداته‌ پارتى دیموكراتى كوردستان، بۆیە ئەو دەنگۆیانەی هەن، دوورن لە راستی و هیچ پێشنیازێکی وەها بۆ یەکێتی نەکراوە.

بەشێک لە میدیاکانی یەکێتی لە زاری ‌سه‌رچاوه‌یه‌كى ئاگادار و باڵاى ناو حزبەکەیان بڵاویانکردووەتەوە، گوایە پارتی رازی بووە بەوەی، وەزارەتی ناوخۆى هه‌رێم لە بەرانبەر دەستبەرداربوونی یەکێتی لە پۆستی سەرۆککۆمار بە حزبەکەیان بدات، بەڵام سەرکردە پلە باڵاکەی پارتی رەتیکردەوە هیچ رێککەوتنێکی لەمجۆرە لەگەڵ یەکێتی کرا بێت.

دوای کشانەوەی نەوزاد هادی لە کاندیدبوونی بۆ پۆستی سەرۆککۆماری نوێی عێراق، ئێستا دکتۆر فوئاد حوسێن کاندیدی فەرمی پارتی دیموکراتی کوردستانە بۆ ئەم پۆستە، هەرچەندە پەرلەمانی عێراق رۆژی سێشەممە، 27ـی ئەم مانگە کۆبوونەوەی بۆ هەڵبژاردنی سەرۆککۆماری نوێی عێراق رێکخست، بەڵام دواجار کۆبوونەوەکە لەسەر داوای یەکێتیی نیشتمانی کوردستان بۆ کاتێکی دیکە دواخرا. چاوەڕوان دەکرێت لەم نزیکانە دەستەی سەرۆکایەتیی پەرلەمانی عێراق وادەیەکی دیکە بۆ کۆبوونەوەی هەڵبژاردنی سەرۆککۆمار رابگەیەنێت و کارنامەی کۆبوونەوەکە بڵاو بکاتەوە.

 ئێستا ئەم 18 کاندیدە لە کێبرکێی بەدەستهێنانی پۆستی سەرۆککۆماری نوێی عێراقن:

1- د. عەبدوڵڵا محەممەد عەلی عەلیاوەیی

2- فوئاد محەممەد حوسێن بەکی

3- نزار محەممەد سەعید محەممەد

4- شوان حەوێز فەریق نامیق

5- ئەحمەد عەبدوڵڵا تۆفیق ئەحمەد

6- حوسێن تەها حەسەن محەممەد سنجاری

7- نەجمەددین عەبدولکەریم حەمەکەریم نەسروڵڵا

8- ئاسۆ فەرەیدوون عەلی

9- سامان عەلی ئیسماعیل شاڵی

10- سەباح ساڵح سەعید

11- ئیقبال عەبدوڵڵا ئەمین هەلیوی

12- سەردار عەبدوڵڵا مەحموود

13- موسەننا ئەمین نادر

14- خالید سدیق عەزیز محەمەد

15- ئازاد مەجید حەسەن

16- رافع عەبدوڵڵا حەمید موسا

17- سالم حەواس عەلی ساعدی

18- لەتیف محەممەد جەمال رەشید