مایکڵ ریگەس: دەمانەوێت گرووپە چەکدارەکانی عێراق چەک بکرێن
جێگری وەزیری دەرەوەی ئەمریکا بۆ کاروباری بەڕێوەبردن و سەرچاوەکان رایگەیاند، دەیانەوێت حکوومەتی نوێی عێراق ئاشتیخواز بێت، جەختیشدەکاتەوە پێداگیری لەسەر چەک دانانی گرووپە چەکدارەکان دەکەن.
مایکڵ ریگەس، جێگری وەزیری دەرەوەی ئەمریکا بۆ کاروباری بەڕێوەبردن و سەرچاوەکان تایبەت بەکوردستان24ـی رایگەیاند، دەیانەوێت حکوومەتی نوێی عێراق ئاشتیخواز بێت و بتوانێت گرووپە چەکدارەکان چەک بکات، لەگەڵ ئەوەشدا کار بۆ بەرژەوەندیی هەموو عێراقییەکان بکات.
سەبارەت بە گۆڕینی مارک ساڤایا بە تۆم بەڕاک لە دۆسیەی عێراق، جێگری وەزیری دەرەوەی ئەمریکا گوتی: تائێستا هیچ راگەیەندراوێکی فەرمیان لەوبارەیەوە نییە، بەڵام تۆم بەڕاک کاری باش و ناوازەی لە سووریا کردووە و بە باشی خزمەتی ئەجێندای دۆناڵد ترەمپی کردووە.
ئاماژەی بەوەشکرد، من بەمنزیکانە لە عێراق و هەرێمی کوردستان بووم، ئێمە کونسوڵخانەی نوێمان لە هەولێر کردەوە، هەروەها چاومان بەژمارەیەک بەرپرسی سیاسی و حکوومی کەوت، هانی بەرپرسانی عێراقماندا کە بە زوویی حکوومەت پێکبهێنن و کار لەسەر چەکدانانی گرووپە چەکدارەکان بکەن، بەجۆرێک ئەو گرووپانە بەشێوەیەکی ئاشتیانە تێکەڵی کاری سیاسی ببن.
سەبارەت بە هەبوونی ڤیتۆ لەسەر کەسایەتیەکان مایکڵ ریگەس گوتی: سەرۆک ترەمپ بەم دواییانە بەروونی کۆمێنتی خۆی لەبارەی پێکهێنانی حکوومەتی عێراق و خواستی ئەمریکا داوە، شتەکانی روون کردەوە.
جێگری وەزیری دەرەوەی ئەمریکا بۆ کاروباری بەڕێوەبردن و سەرچاوەکان دەشڵیت: دەزانین جۆرێک لە عورفی سیاسی هەیە بۆ دابەشکردنی دەسەڵاتەکان لەنێوان پێکهاتەکانی عێراق، هانی هەموولایەک دەدەین حکوومەتێکی ئاشتی خواز پێکبهێنن کە بەرگەگر بێت و بتوانێت لە بەرژەوەندیی هەموو عێراقییەکان کاربکات و بتوانێت لەرووی دیپلۆماسییەوە لەگەڵ ئەمریکا و تەواوی جیهان کار بکات.
لە کۆتایی قسەکانیدا گوتی: هیچ قسەیەکم لەبارەی گۆڕانی مارک ساڤایا و هاتنی تۆم باراک بۆ عێراق نییە، بەڵام بەڕاک کاری ناوازەی بۆ سەرۆک ترەمپ کردووە هەم وەکو باڵیۆزی ئەمریکا لە تورکیا و هەمیش وەکو نێردەی تایبەتی ئەمریکا لە سووریا.