بەرپرسێکی ئەمریکی: بە هاوبەشی ئیسرائیل هێرش دەکەینە سەر ئێران
بەرپرسێکی باڵای ئەمریکی ئاشکرایکرد، ویلایەتە یەکگرتووەکانی ئەمریکا بەشداری راستەوخۆ دەکات لەو هێرشانەی دەکرێنە سەر ئێران.
ئەو بەرپرسە ئەمریکییە کە نەیویستووە ناوی ئاشکرا بکرێت، بە کەناڵی جەزیرەی راگەیاندووە، هێرشەکانی سەر خاکی ئێران بە هاوبەشی ئەمریکا و ئیسرائیل ئەنجام دەدرێن.
هاوکات ئەو بەرپرسە جەختیشی لەوە کردەوە، هێزە ئاسمانییەکانی ئەمریکا بەشدارن و رۆڵیان هەیە لە جێبەجێکردنی ئەو هێرشە هاوبەشانەی دەکرێنە سەر ئێران.
یسرائیل کاتز، وەزیری بەرگریی ئیسرائیل رایگەیاند، بەیانیی ئەمڕۆ شەممە، 28ـی شوباتی 2026 "هێرشی پێشوەختەمان لە دژی ئێران دەست پێکردووە و ژمارەیەک هێرشی ئاسمانیمان کردووەتە سەر تارانی پایتەختی ئەو وڵاتە."
هەروەها میدیاکانی ئیسرائیل ئاماژەیان بەوە کردووە، هێرشەکان بە هاوبەشی لەگەڵ ئەمریکا دەکرێن.
هاوکات میدیاکانی ئێران بڵاویان کردووەتەوە، بەردەوام دەنگی تەقینەوەی نوێ لە ناوەندی تارانی پایتەختی ئێران دەبیسترێت و لە بەیانییەوە چەندان شوێنی جیاواز بۆمباران کراون.
کەنالی 12ـی ئیسرائیلیش رایگەیاند، هێرشی ئاسمانی کراوەتە سەر دەیان پێگەی سەربازی لە ئێران. بە گوێرەی هەمان سەرچاوە، ئیسرائیل ئاسمانی خۆی بە تەواوەتی داخستووە و چەندان کۆمپانیای هێڵی ئاسمانی گەشتە ئاسمانییەکانیان بۆ تەلئەڤیڤ هەڵوەشاندووەتەوە.
حکوومەتی ئیسرائیل باری نائاسایی لە ناوخۆی وڵاتەکە راگەیاندووە و دەوامی قوتابخانە و ناوەندەکانی خوێندنی راگرت. بەهۆی ئەم دۆخەشەوە هاتوچۆی هاووڵاتییان لە هەندێک ناوچەی ئیسرائیل سنووردار کراوە.