ئەمریکا و وڵاتانی کەنداو راگەیەندراوێکی هاوبەشییان لەبارەی هێرشەکانی ئێران بڵاو کردەوە
ویلایەتە یەکگرتووەکانی ئەمریکا و شەش وڵاتی عەرەبی لە راگەیەندراوێکی هاوبەشدا، بە توندی سەرکۆنەی هێرشە مووشەکی و درۆنییەکانی کۆماری ئیسلامی ئێرانیان کرد بۆ سەر سەروەریی خاکی وڵاتانی ناوچەکە، لەنێویاندا هەرێمی کوردستان و ئەو کردەوانەیان بە پەرەسەندنێکی مەترسیدار وەسف کرد.
دووشەممە 2ـی ئاداری 2026، وەزارەتی دەرەوەی ویلایەتە یەکگرتووەکانی ئەمریکا، بەحرەین، ئوردن، کوێت، قەتەر، سعودیە و ئیمارات لە راگەیەندراوێکی هاوبەشەکەدا ئاماژەیان داوە، "ئێران بە شێوەیەکی بێباکانە و هەڕەمەکی هێرشی کردووەتە سەر هەرێمی کوردستان و وڵاتانی بەحرەین، عێراق، ئوردن، کوێت، عومان، قەتەر، سعوودییە و ئیمارات؛ کە ئەم هێرشانە هیچ پاساوێکیان نییە و بوونەتە مەترسی بۆ سەر ژیانی مەدەنییەکان و زیانگەیاندن بە ژێرخانی وڵاتان.
ئەو وڵاتانە جەختیان کردووەتەوە، ڕەفتارەکانی تاران پێشێلکردنی ئاشکرای سەروەریی چەندین دەوڵەتە و دەبێتە هۆی تێکدانی سەقامگیریی ناوچەکە. لە راگەیەندراوەکەدا هاتووە، بە ئامانجگرتنی ئەو وڵاتانەی بەشێک نین لە هیچ شەڕ و ململانێیەک، ڕەفتارێکی ناسەقامگیرکەرە و هەڕەشەیەکی گەورەیە بۆ سەر ئاشتیی نێودەوڵەتی.
ئەمریکا و هاوپەیمانە عەرەبەکانی یەکڕیزیی خۆیان بۆ پاراستنی هاووڵاتییان و خاک و سەروەرییان راگەیاند و دووپاتیان کردەوە کە مافی تەواوی خۆیانە بەرگری لەخۆیان بکەن لە بەرانبەر ئەم هێرشانەدا.
هەروەها پابەندبوونی خۆیان بە ئاسایشی ناوچەکە نیشان دا و دەستخۆشییان لە هەماهەنگییە کاریگەرەکانی بەرگریی ئاسمانی کرد کە توانیویانە رێگری لە زیانی گیانی و وێرانکاریی زۆر گەورەتر بکەن.
