عەلی حوسێن: کێشەمان لەگەڵ نزار ئامێدی و یەکێتی نییە

ئەمڕۆ سێشەممە، 14ـی نیسانی 2026، عەلی حوسێن، ئەندامی مەکتەبی سیاسی و  بەرپرسی مەکتەبی رێکخستنی سلێمانی - هەڵەبجەی پارتی دیموکراتی کوردستان لە لێدوانێکی رۆژنامەوانیدا رایگەیاند، دوای ئەو دۆخەی لە بەغدا لە هەڵبژاردنی سەرۆککۆمار روویدا، هەنگاوەکانی کۆبوونەوەی و رێککەوتنی پارتی و یەکێتیشی گۆڕانکاریان بەسەدا دێت، دۆخی ناوچەکەش کاریگەری لەسەر هەرێمی کوردستان دەبێت.

عەلی حوسێن گوتیشی: "کۆبوونەوەکانمان بەردەوامن بۆ ئەوەی بەرنامەی داهاتوومان دیاری بکەین و بزانین چۆن مامەڵە لەگەڵ دۆخە نوێیەکەدا دەکەین."

لەبارەی کشانەوەی پارتی لە بەغدا، عەلی حوسێن گوتی: "ئێمە نەکشاینەوە، سەرۆک بارزانی داوای لە هەردوو فراکسیۆنی پەرلەمان و حکوومەت کردووە بۆ راوێژ و هەڵسەنگاندنی دۆخەکە (بگەڕێنەوە هەولێر) و دوێنێ کۆبوونەوەکە کرا و بێگومان کۆبوونەوەکان بەردەوام دەبن. هەڵبەتە بەرژەوەندییەکانی گەلی کورد و کوردستانی لە کوێ بێت، سەرۆک بارزانی و پارتی بەو ئاراستەیە بڕیار دەدەن".

سەبارەت بە هەڵوێستی پارتی بەرامبەر سەرۆککۆماری نوێ، عەلی حوسێن رایگەیاند: "کێشەی ئێمە نە لەگەڵ نزار ئامێدییە و نە لەگەڵ هیچ کەسێکی دیکە، تەنانەت کێشەمان لەگەڵ یەکێتیش نییە وەک حزبێکی سیاسی. کێشەی ئێمە لەسەر بنەمایەکی سیاسییە کە لە دوای 2003لە عێراقدا چەسپاوە."

گوتیشی: "بەگوێرەی عورفی سیاسی، سەرۆکایەتی کۆمار بۆ کوردە، سەرۆکایەتی پەرلەمان بۆ عەرەبی سوننە و سەرۆکایەتی ئەنجوومەنی وەزیران بۆ عەرەبی شیعەیە. هەر پێکهاتەیەک خۆی نوێنەری خۆی دیاری دەکات. شیعەکان پێکەوە سەرۆکوەزیران و سوننەکانیش پێکەوە سەرۆک پەرلەمان دیاری دەکەن. داوای ئێمەش ئەوە بوو کە لایەنە کوردستانییەکان پێکەوە بڕیار لەسەر سەرۆککۆمار بدەن بۆ ئەوەی کورد لە بەغدا بەهێز بێت."

عەلی حوسێن رەخنەی لەوە گرت، لایەنێکی کوردی لە دەرەوەی یەکڕیزیی کورد و لەگەڵ لایەنە عەرەبییەکان رێککەوتن بکات بۆ پۆستی سەرۆککۆمار، چونکە ئەمە پێگەی هەرێمی کوردستان لاواز دەکات و دەبێتە هۆی ئەوەی لایەنە عەرەبییەکان لەسەر حیسابی بەرژەوەندییەکانی کورد بڕیار بدەن.

گوتیشی: "ئەگەر حزبە کوردییەکان کۆک نەبن لەسەر سەرۆککۆمار، دەکرێت پەرلەمانتارەکان لە ئەنجوومەنی نوێنەرانی عێراق کە کوردن نوێنەرێک بۆ سەرۆککۆمار دیاری بکەن، نەک لایەنێکی کوردی بەتەنیا بڕیار لەسەر سەرۆککۆمار بدات و لەگەڵ لایەنێکی عەربی رێکبکەوێت، لایەنە عێراقییەکان رەچاوی بەرژەوەندی خۆیان دەکەن ئەو بەرژەوەندییەش لەسەر حسابی هەرێمی کوردستان و کوردە، ئێمە تێبینیمان تەنیا ئەوە بووە ئەگەر نا سەرۆککۆمار هەرکێبێت ئێمە کێشەمان نییە."

دەشڵێت: "لەسەردەمی مام جەلال تاکوو ئێستا هەڵوێستی پارتی دیار بووە، پارتی لە زۆر وێستگەدا پاڵپشت و پشتگیری یەکێتیی بووە، ئەمجارەش گرفتێکمان نەبووە لە پشتگیری یەکێتی، گرفتی ئێمە لە چۆنییەتی هەڵبژاردنی سەرۆککۆمارە."

ئاماژە بەوەش دەکات، ئەو لایەنەی کە رێککەوتووە و لەگەڵ لایەنە عەربەکان سەرۆککۆمار هەڵبژێرێت بەبێ کورد، بە دڵنیاییەوە لەسەر حسابی کۆمەڵێک رێککەوتن بووە، لە سەر حسابی پارێزگاری کەرکووک دەبێت و لەسەر حسابی کۆمەڵێک دەستکەوتی دیکە دەبێت کە پەیوەندی بە کوردەوە هەیە. ئەمە زیان بە بەرژەوەندییەکانی هەرێمی کوردستان و ئایندەی هەرێمی کوردستان دەگەیەنێت، ئەگینا ئێمە گرفتمان نییە سەرۆککۆمار کورد بێت، بەڵام کورد هەڵیبژێرێت، هەروەک شیعە چۆن نوێنەری خۆی و سووننە نوێنەری خۆی هەڵدەبژێرێت، کوردیش وا نوێنەری خۆی هەڵبژێرێت.

عەلی حوسێن ئەوەشی روون کردەوە کە "ئەوانەی رۆژانە هەرێمی کوردستان بۆردومان دەکەن دیارە کە کێن و هەموو خەڵکی کوردستان دەزانێت ئەوانە کێن، ئێمە پێمان وابوو ئەگەر کورد یەک دەنگ بێت ئەو خەڵکانەی هەرێمی کوردستان بۆردومان دەکەن جورئەتی ئەوەیان نەدەما کوردستان بۆردومان بکەن. ئەوانەی سەرۆککۆمارییان هەڵبژاد هەر ئەوانە بوون کوردستانیان بۆرومان دەکرد."

 لە بەشێکی دیکەی قسەکانیدا، ئەو بەرپرسەی پارتی باسی لە گرنگی کەرکوک کرد و گوتی: "کەرکوک و کەرکوکییەکان دڵی کوردستانن. مێژووی پارتی و بزووتنەوەی رزگاریخوازی کورد شاهیدی ئەوە دەدەن کە پارتی لەگەڵ رژێمی بەعس رێککنەکەوتووە لەسەر کەرکووک و هەرگیز لەسەر کەرکوکیش سازشی نەکردووە."

ئاماژەی بەوەش کرد، هەمان تێبینییان لەسەر پۆستی پارێزگاری کەرکوک هەیە؛ پێویستە دیاریکردنی پارێزگار پەیامێکی کوردستانی بێت بۆ ئەوەی بتوانرێت ماددەی 140 جێبەجێ بکرێت و رێگری لە تەعریب و زوڵمکردن لە جووتیارانی کورد بکرێت.

لە کۆتاییدا، عەلی حوسێن جەختی کردەوە، پارتی دیموکراتی کوردستان بەردەوام دەبێت لەسەر بەرنامە سیاسییەکەی و هەوڵەکانی بۆ پاراستنی یەکڕیزیی نێوان لایەنەکان. گوتی: "ئێمە دەمانەوێت بە یەکڕیزی بڕیار لەسەر پرسە چارەنووسسازەکان بدەین، چونکە ئەمە تەنیا شەڕی حزبێک نییە، بەڵکو شەڕی پاراستنی پێگەی هەرێمی کوردستان و داهاتووی گەلەکەمانە."