ئەردۆغان: پڕۆسەی ئاشتی بە ئەرێنی بەردەوامە

رەجەب تەیب ئەردۆغان، سەرۆککۆماری تورکیا رایگەیاند، پڕۆسەی ئاشتی بە ئاراستەیەکی ئەرێنیدا دەروات و هیچ بەربەست و داخرانێک لە پڕۆسەکەدا نییە.

ئەمڕۆ پێنجشەممە، 23ـی نیسانی 2026، لە میانی بەشداریکردنی لە رێوڕەسمی 106ـەمین ساڵیادی دامەزراندنی پەرلەمانی تورکیا، ئەردۆغان وەڵامی پرسیاری رۆژنامەنووسانی دایەوە. سەبارەت بە دوایین پێشهاتەکانی پڕۆسەی ئاشتی، سەرۆککۆماری تورکیا رایگەیاند "پڕۆسەکە بە شێوەیەکی زۆر ئەرێنی و بە هەمان خێرایی بەردەوامە و هیچ شتێک پەکینەکەوتووە."

ئەردۆغان دەربارەی پەیوەندیەکانیان لەگەڵ پارتی ئۆپۆزسیۆن ئاماژەی بەوە دا "بێگومان لەگەڵ پارتی ئۆپۆزسیۆنی سەرەکی کۆدەبینەوە، بۆچی کۆنەبینەوە؟ من پارتی دەسەڵاتدارم و ئەوانیش پارتی سەرەکیی ئۆپۆزسیۆنن."

ئەم لێدوانانەی ئەردۆغان لە کاتێکدایە کە چاودێرانی سیاسی بە وردی چاودێری هەنگاوەکانی حکوومەتی تورکیا و لایەنەکان دەکەن سەبارەت بە پڕۆسەی چارەسەری و ئاساییکردنەوەی پەیوەندییە سیاسییەکان لە ناوخۆی ئەو وڵاتەدا.

لەبارەی پرۆسەی ئاشتی لە تورکیا.

رۆژی دووشەممە 12ـی ئایاری 2025، پارتی کرێکارانی کوردستان (پەکەکە) لە راگەیەنراوێکدا ئەنجامی 12ـەمین کۆنگرەی بڵاو کردەوە، لە رۆژانی 5 بۆ 7ـی هەمان مانگ بەستبوویان، لە راگەیەندراوی کۆتایی کۆنگرەدا، پەکەکە بڕیاری هەڵوەشاندنەوەی پەیکەری رێکخراوەیی و کۆتاییهێنان بە خەباتی چەکداری دا.

جارێکی دیکە و لە ڕۆژی چوارشەممە 9ـی تەممووزی 2025، پەیامێکی دیکەی ڤیدیۆیی عەبدوڵڵا ئۆجەلان سەبارەت بە پرۆسەی چەکدانانی پەکەکە بڵاو کرایەوە و دووجار وەک قۆناغێکی دیکەی پرۆسەی نوێی ئاشتی لە تورکیا و باکووری کوردستان، پارتی کرێکارانی کوردستان لە چوارچێوەی رێوڕەسمێکدا لە بەردەم ئەشکەوتی جاسەنە، لە سنووری سوورداشی پارێزگای سلێمانی بە بەشداری 30 چەکدار دوای خوێندنەوەی پەیامی چەکدانانیان، 30 پارچە چەکیان سووتاند.

هەینی 21ـی تشرینی دووەمی 2025، پەرلەمانی تورکیا بە دەنگی سێ لەسەر پێنجی کۆی ئەندامانی کۆمیسیۆنی هاودەنگی نیشتمانی، برایەتی و دیموکراسی بڕیاریدا سەردانی عەبدوڵڵا ئۆجەلان بکەن لە دوورگەی ئیمراڵی.

لە کۆمیسیۆنەکەدا 32دەنگی بەڵێ، 3 دەنگی بێلایەن و 2 دەنگی نەخێر هەبوون.