کونسوڵی پێشووی کۆریای باشوور ستایشی کوردستان24 دەکات

کونسوڵی گشتیی پێشووی کۆماری کۆریای باشوور لە هەولێر، لە چاوپێکەوتنێکدا وێڕای ستایشکردنی ئاستی پیشەییبوونی کەناڵی کوردستان24، ستایشی خێرایی و وردبینی کەناڵەکە دەکات لە گواستنەوەی رووداوەکاندا.

کەناڵی کوردستان24، چاوپێکەوتنێکی تایبەتی لەگەڵ سینگچۆل لیم، کونسوڵی گشتیی پێشووی کۆماری کۆریای باشوور لە هەولێر ئەنجامداوە و بڕیارە تەواوی چاوپێکەوتنەکە شەوی شەممە بڵاو بکرێتەوە، دیپلۆماتکارە کۆرییەکە باس لە چەندین تەوەری گرنگی پەیوەست بە کارکردنی دیپلۆماسی و ئەزموونی کەسیی خۆی لە هەرێمی کوردستان دەکات.

لە سەرەتای قسەکانیدا، سینگچۆل لیم خۆشحاڵی و شانازی خۆی دەربڕی بەوەی کە بەر لە ماڵئاواییکردن و جێهێشتنی کوردستان، دوایین چاوپێکەوتنی میدیایی لەگەڵ دامەزراوەی کوردستان24 ئەنجام داوە. 

ستایشی بێوێنەی کەناڵەکەی کرد و جەختی لەوە کردەوە کە کوردستان24 خاوەنی تایبەتمەندییەکی پیشەیی بەرزە، ئەویش "خێرایی و دیققەتی تەواوە لە ڕووماڵکردن و گەیاندنی هەواڵەکاندا".

هەروەها ئاشکرای کرد کە، بەردەوام سەردانی وێبسایتی بەشی ئینگلیزیی کوردستان24 دەکات و رۆژانە سەرچاوەی سەرەکی خوێندنەوەی هەواڵەکانیەتی.

لە بەشێکی دیکەی چاوپێکەوتنەکەدا، کونسوڵی پێشووی کۆریای باشوور لاپەڕەکانی ئەزموونی دوو ساڵ و نیوی کارکردنی لە هەولێر هەڵدایەوە و ئاماژەی بەوە کرد، کە لەو ماوەیەدا سەردانی زۆرێک لە ناوچە جیاوازەکانی هەرێمی کوردستانی کردووە و وانەی زۆر گرنگی لەو ئەزموونە فێر بووە.

بە تێڕوانینی ئەو دیپلۆماتکارە، هەرێمی کوردستان خاوەنی پێگەیەکی کۆمەڵایەتی و کولتووریی دەوڵەمەندە و دەتوانرێت لە چوار خەسڵەتی سەرەکیدا پێناسە بکرێت:

1- هەمەچەشنی و هەمەڕەنگی، کە جوانییەکی تایبەتی بە هەرێمەکە بەخشیوە.

2- میواندۆستیی بێوێنەی خەڵکی کوردستان کە هەمیشە دەرگایان کراوەیە.

3- بوونی خەڵکانێکی زۆر زیرەک و لێهاتوو کە سەرمایەیەکی گەورەی مرۆیین بۆ داهاتوو.

4- خۆڕاگریی گەلی کوردستان، کە وەک ئەو باسی کرد، گەلێکن بە ئیرادەیەکی پۆڵایینەوە توانیویانە رووبەڕووی سەخترین قەیرانەکان ببنەوە و بە سەرکەوتوویی تێیان بپەڕێنن.