زەیدی جەخت لە خەرجکردنی مووچەی فەرمانبەرانی کوردستان دەکاتەوە
سەرۆکوەزیرانی فیدراڵ جەخت لە بەردەوامیی خەرجکردنی مووچەی فەرمانبەرانی عێراق و هەرێمی کوردستان دەکاتەوە.
ئەمڕۆ یەکشەممە، 21ـی حوزەیرانی 2026، حەیدەر عەبوودی، گوتەبێژی حکوومەتی عێراق بە دیلان بارزان، پەیامنێری کوردستان24ـی راگەیاند، "عەلی زەیدی، سەرۆکوەزیرانی عێراق ئەمڕۆ، پێی راگەیاندووم، مووچەی تەواوی فەرمانبەرانی عێراق و هەرێمی کوردستان کێشەی نییە و مانگانە لە وادەی خۆیدا خەرج دەکرێت".
پەیامنێری کوردستان24 لە بەغدا رایگەیاند، وەزارەتی دارایی فیدڕاڵ تەمویلی مووچەی مانگی حوزەیران (شەش)ـی وەزارەتەکانی عێراقی دەستپێکردووە و بڕیاریشە دواتر تەمویلی مووچەی هەمان مانگی فەرمانبەرانی هەرێمی کوردستان بخاتە سەر هەژماری وەزارەتی دارایی و ئابووریی حکوومەتی هەرێم.
هەفتەی رابردوو لیستی مووچە و تەرازووی پێداچوونەوەی ئەم مانگە رادەستی وەزارەتی دارایی فیدڕاڵ کران. لەگەڵ گەیشتنی پارەکەش راستەوخۆ و لە سێ رۆژدا مووچەی سەرجەم وەزارەت و دەستەکان دابەش دەکرێت.
ئەم مانگەش 900 هەزار فەرمانبەر لە پڕۆژەی هەژماری من تۆمارکراون و زیاتر لە 800 هەزار مووچەخۆر بەشێوەی دیجیتاڵی مووچەکەیان وەردەگرن.