بەقایی: لەگەڵ زەیدی چەند رێککەوتنێک واژۆ دەکەین
گوتەبێژی وەزارەتی دەرەوەی ئێران دەڵێت "سەردانی عەلی زەیدی سەرۆکوەزیرانی عێراق بۆ تاران، جەختکردنەوەیە لە پەیوەندی و بەرژەوەندیی دوولایەنەیە، کە واژۆ لەسەر چەند رێککەوتننامەیەک دەکرێت".
ئیسماعیل بەقایی گوتەبێژی وەزارەتی دەرەوەی ئێران دەڵێت: هەمووان لە گرنگی پەیوەندییەکانی ئێران و عێراق ئاگادارن و هەمیشە رێزێکی تایبەتمان بۆ سەقامگیری، خۆشگوزەرانی، سەروەری و سەربەخۆیی عێراق هەبووە، هاوکات رێز لە گۆڕانکاریی دۆخی ناوخۆی دەگرین، پێچەوانەی سیاسەتی ئەمریکا کە هەمیشە دەستوەردان لە وڵاتانی ناوچەکە، بە عێراقیشەوە دەکات و هەژموونی خۆی دەسەپێنێت.
گوتیشی: سەردانی سەرۆکوەزیرانی عێراق بۆ کۆماری ئیسلامی ئێران زۆر گرنگە و هەر لە ئێستاکەوە بەخێرهاتنی زەیدی و شاندی یاوەری دەکەین و دڵنیاین ئەم سەردانەی دەبێتە خاڵی وەرچەرخانی لە پەرەپێدانی پەیوەندییەکانی نێوان دوو وڵاتی موسڵمان و دراوسێ.
هەروەها ئاماژەیداوە، بڕیارە لەم سەردانەی زەیدی دا، گفتوگۆ لە بارەی پەرەپێدانی پەیوەندی و هاوکارییەکانی نێوان تاران و بەغدا بکرێت بە تایبەت لە بارەی هاوکاریی ئابووری، بازرگانی و پرسی ئاسایش و تۆکمەترکردنی سنوورەکان.
ئیسماعیل بەقایی پێشبینی دەکات لە میانی سەردانەکەی سەرۆکوەزیرانی عێراق چەند رێککەوتنێک و یاداشتێکی لێکگەیشتن واژۆ بکرێن.
هەر ئەمڕۆ دووشەممە، حەیدەر عەبوودی گوتەبێژی حکوومەتی عێراق راگەیاند، بەم نزیکانە عەلی زەیدی سەرۆکوەزیرانی عێراق سەردانی هەر یەک لە ئێران و تورکیا دەکات، بەوپێیە عێراق پێگە و رۆڵێکی گرنگ لە ناوچەکە هەیە بۆ هێورکردنەوەی دۆخی ئاڵۆزی ناوچەکە و پشتیوانی لە بەردەوامبوونی دیالۆگ، لە پێناو سەقامگیری ناوچەکە.