40 گوندی سنووری سەنگاو لە پڕۆژەی نوێی رێگاوبان سوودمەند دەبن

ژمارەیەک پڕۆژەیەکی ستراتیژیی رێگاوبان لە سنووری ناحیەی سەنگاو بە گوژمەی زیاتر لە دوو ملیار دینار کرانەوە، کە گرنگترینیان رێگەی نێوان سەنگاو - دەربەندیخانە.

ئەمڕۆ یەکشەممە، 26ـی تەممووزی 2026، وەزارەتی ئاوەدانکردنەوە و نیشتەجێکردنی حکوومەتی هەرێمی کوردستان، بڵاویکردەوە، چەند پڕۆژەیەکی گرنگی رێگاوبانی لە سنووری ناحیەی سەنگاو تەواوکران، کە پێکهاتبوون لە رێگەی سەنگاو-دەربەندیخان، قیرتاوکردنی رێگەی بەردەم ناحیەی سەنگاو، رێگەی گوندی قەڵای شێخ رەشید و رێگەی گوندی کارێزەی دەلۆ.

1- رێگەی سەنگاو - دەربەندیخان:
ئەم رێگەیە بە درێژیی 18 کیلۆمەتر و بە چوار قۆناخ جێبەجێ کراوە، گوژمەی پرۆژەکە ملیارێک و 600 ملیۆن دینار بووە و لەسەر بودجەی ئاسایی وەزارەت، لەلایەن بەڕێوەبەرایەتیی چاککردن و پاراستنی رێگاوبانی چەمچەماڵەوە تەواو کراوە، ئەم رێگەیە سوودی بۆ زیاتر لە 40 گوندی ناوچەکە دەبێت و هاتوچۆی نێوان سەنگاو و دەربەندیخان ئاسان دەکات.

2- رێگەی ناحیەی سەنگاو و گوندی قەڵای شێخ رەشید:
ئەم پرۆژەیە بە درێژیی 2.8 کیلۆمەتر و بە گوژمەی زیاتر لە 440 ملیۆن دینار قیرتاو کراوە، وەک بەشێک لە هەوڵەکانی حکوومەت بۆ ئاوەدانکردنەوەی گوند و ناحیەکان.

3- رێگەی گوندی کارێزەی دەلۆ:
پڕۆژەیەکی دیکەی گرنگ بوو کە درێژییەکەی نزیکەی دوو کیلۆمەترە و بە گوژمەی 207 ملیۆن دینار، لەژێر سەرپەرشتیی رێگاوبانی سلێمانی جێبەجێ کراوە.

دانیشتووانی ناوچەکە و کەسایەتییەکانی سنوورەکە، سوپاس و پێزانینی خۆیان ئاراستەی وەزارەتی ئاوەدانکردنەوە کرد بۆ تەواوکردنی ئەم پڕۆژە خزمەتگوزارییانە کە کاریگەریی راستەوخۆیان لەسەر ژیانی رۆژانەیان دەبێت.