سەرۆک و ئەندامانی لیژنە هەمیشەییەکان هەڵدەبژێردرێن

پەرلەمانی عێراق بە مەبەستی دەنگدان لەسەر سەرۆک و ئەندامانی 23 لیژنەی هەمیشەیی کۆدەبێتەوە.

بڕیارە کاتژمێر 02:00ـی پاشنیوڕۆی ئەمڕۆ پێنجشەممە، 29ـی تشرینی یەکەمی 2026، پەرلەمان عێراق بۆ دەنگدان بە سەرۆک و ئەندامی لیژنە هەمیشەییەکان کۆببێتەوە.

پەرلەمانی عێراق 23 لیژنەی هەمیشەیی هەیە و بەگوێرەی بەرکەوتەی هەڵبژاردن، پۆستەکانی سەرۆک، جێگری سەرۆک، بڕیاردەر و ئەندامانی لیژنەکان بەسەر لایەنەکاندا دابەش دەکرێن.

دانیشتنەکە دوای ئەوە دێت، دەستەی سەرۆکایەتیی پەرلەمان بە سەرۆکایەتیی هەیبەت حەلبووسی، سەرۆکی پەرلەمان و عەدنان فیحان و فەرهاد ئەترووشی، جێگرانی سەرۆکی پەرلەمان، کۆبوونەوەیەکی بەپەلەیان کرد.

ئامانجی کۆبوونەوەکە ئامادەکاری بووە بۆ دانیشتنی ئەمڕۆی پەرلەمانی عێراق، لەبەرئەوەی تاوەکو ئێستا ناکۆکی لە نێوان فراکسیۆنەکاندا هەیە لەسەر دابەشکردنی پۆستی سەرۆکی لیژنەکان.

لە دوای پرۆسەی هەڵبژاردن و پێکهێنانی حکوومەت لە عێراق، یەکێک لە قۆناخە سەختەکانی نێو پەرلەمان، دابەشکردن و پێکهێنانی لیژنە هەمیشەییەکانە. پەرلەمانی عێراق پێکدێت لە چەندین لیژنەی گرنگ، وەک لیژنەکانی دارایی، ئاسایش و بەرگری، نەوت و گاز لەگەڵ لیژنەی یاسایی. زۆرجار هێزە سیاسییەکان ململانێی تووند دەکەن بۆ بەدەستهێنانی سەرۆکایەتیی ئەم لیژنە هەستیارانە، چونکە رۆڵی سەرەکییان هەیە لە چاودێریکردنی دامەزراوەکانی حکوومەت و داڕشتنی پرۆژەیاساکاندا.