پۆلیسی هەولێر: تەرمی ئافرەتێکمان دۆزیوەتەوە؛ چوار تۆمەتباریش دەستگیر کراون

پۆلیسی پارێزگای هەولێر دۆزینەوەی تەرمی ئافرەتێکی لە ناوچەی شێخ توراب راگەیاند، هاوکات چوار کەسیش بە تۆمەتی تێوەگلان لە رووداوەکە دەستگیر کرد.

پۆلیسی پارێزگای هەولێر لە راگەیەنراوێکدا ئاماژەی بەوە دا، رۆژی چوارشەممە، 28ـی تشرینی یەکەمی 2026، هێزەکانیان لە بوونی تەرمی ئافرەتێک لە گوندی شێخ توراب ئاگادار کراونەتەوە. 

بەڕێوەبەرایەتیی پۆلیسی پارێزگای هەولێر ئەوەی خستەروو، دەستبەجێ تیمەکانیان لە بەشی پۆلیسی هەریر گەیشتوونەتە شوێنی رووداوەکە و دەستیان بە لێکۆڵینەوە کردووە. لە ئەنجامی بەدواداچوونەکاندا هێزەکانی پۆلیس توانیویانە چوار تۆمەتبار دەستگیر بکەن بە ناوەکانی (ح. س. ا)، (م. ح. س)، (م. ح. س) و (ا. ر. ک).

هەروەها پۆلیسی هەولێر باسی لەوە کرد، ئێستا دۆسیەی لێکۆڵینەوە بۆ تۆمەتباران کراوەتەوە و لە چوارچێوەی رێکارە یاساییەکاندا مامەڵەیان لەگەڵ دەکرێت بۆ ئەوەی یاسا سەروەر بێت.

گوندی شێخ توراب یەکێکە لە ناوچە سروشتی و گەشتیارییەکان و دەکەوێتە دووریی 38 کیلۆمەتر لە ناوەندی شاری هەولێر. ناوچەکە بەهۆی جوانیی دیمەنەکەیەوە ساڵانە لە وەرزی بەهاردا پێشوازی لە ژمارەیەکی زۆری گەشتیاران دەکات، بەڵام بەهۆی چۆڵەوانیی بەشێک لە رێگا و دەوروبەرەکەی، جاربەجار رووداوی نەخوازراو لەم جۆرە ناوچانەدا تۆمار دەکرێن.