مووچەی فەرمانبەران خرایە سەر هەژماری وەزارەتی دارایی هەرێمی کوردستان

ئەمڕۆ چوارشەممە، 4ـی تشرینی دووەمی 2026، سەرچاوەیەکە لە وەزارەتی دارایی بە کوردستان24ـی رایگەیاند،  834 ملیار و 920 ملیۆن دینار وەک مووچەی مانگی 10ـی فەرمانبەرانی هەرێمی کوردستان خرایە سەر هەژماری بانکیی وەزارەتی دارایی حکوومەتی هەرێمی کوردستان.

سەرچاوەکەی وەزارەتی دارایی راگەیاند، ئەو بڕە پارەیە تایبەتە بە مووچەی فەرمانبەران و بە فەرمی گەیشتووەتە سەر هەژماری وەزارەتەکە.

ئەمە لەکاتێکدایە، هەر ئەمڕۆ  شڤان جەباری، پەیامنێری کوردستان24 رایگەیاند، پرۆسەی خەرجکردنی مووچەی مانگی 10ـی فەرمانبەرانی هەرێمی کوردستان کۆتایی هاتووە و پارەکە بەتەواوی خەرج کراوە، بەمەش چاوەڕوان دەکرێت دوای تەواوبوونی رێکارە داراییەکان، خشتەی دابەشکردنی مووچە رابگەیەندرێت.