تەقینەوەی وێستگەی کارەبای هارسە ژمارەیەک قوربانی لێکەوتەوە

تەقینەوەی وێستگەی هارسە لە بەسرە
تەقینەوەی وێستگەی هارسە لە بەسرە

بەیانی ئەمڕۆ شەممە، 21ـی تشرینی دووەمی 2026، تەقینەوەیەکی بەهێز لە سیستمی گازی وێستگەی کارەبای هارسە لە باکووری بەسرە روویدا و بووە هۆی کەوتنەوەی ئاگرێکی بەرفراوان. رووداوەکە ترس و دڵەڕاوکێیەکی زۆری لە ناوچەکەدا دروست کرد و زیانی زۆری ماددی بە وێستگەکە و ژمارەیەک ئۆتۆمبێلی هاووڵاتییان گەیاند.

بەگوێرەی راپۆرتە میدیاییەکانی عێراق، دوای تەقینەوەکە ئاگرەکە بۆ کۆگاکانی گاز و دەوروبەری وێستگەکە تەشەنەی کردووە و چەندین ماڵی گرتووەتەوە، کە لە ئاکامدا زیاتر لە 17 ماڵ زیانیان بەرکەوتووە.

سەبارەت بە زیانە گیانییەکان، میدیاکانی عێراق بڵاویان کردەوە کە بەهۆی رووداوەکەوە کەسێک گیانی لەدەستداوە و 7 کەسی دیکەش بریندار بوون. بریندارەکان بەهۆی سەختیی برین و تەنگەنەفەسییەوە دۆخی تەندروستییان ناجێگیرە و بۆ وەرگرتنی چارەسەری پزیشکی رەوانەی نەخۆشخانەکانی نزیک کراون؛ ئەمەش لە کاتێکدایە بەرپرسانی بەسرە تا ئێستا هیچ روونکردنەوەیەکی فەرمییان لەبارەی ژمارەی کوژراوان و برینداران رانەگەیاندووە.

لەلایەکی دیکەوە، تیمەکانی بەرگریی شارستانی توانیویانە ژمارەیەک خێزان لە نزیک وێستگەکە رزگار بکەن و بە پشتیوانیی تیمی تەندروستی و ئەمبوڵانسەکان لە ئامادەباشیی تەواودان بۆ کۆنترۆڵکردنی ئاگرەکە و رێگریکردن لە تەشەنەکردنی بۆ ناوچەی نیشتەجێبوونی زیاتر. هاوکات تیمەکانی گەڕان و رزگارکردن لە شوێنی رووداوەکە بەردەوامن لە هەوڵەکانیان بۆ دۆزینەوەی ئەو کەسانەی لەژێر پاشماوەی باڵەخانەکان یان ناو ماڵە زیانلێکەوتووەکاندا گیریان خواردووە.

لێکۆڵینەوە سەرەتاییەکان دەریدەخەن کە ئاگرەکە بەهۆی تەقینەوەی بۆڕییەکی گواستنەوەی گاز بۆ وێستگەکە روویداوە، بەڵام تا ئێستا هۆکاری تەقینەوەی ئەو بۆڕییە بەدیاریکراوی ئاشکرا نەکراوە.

وێستگەی کارەبای هارسە بە دووری 20 کیلۆمەتر لە باکووری بەسرە هەڵکەوتووە و بەپێی ئامارەکانی وەزارەتی کارەبای عێراق، توانای بەرهەمهێنانی 1,400 مێگاوات کارەبای هەیە.