ئەمڕۆ چوارشەممە 08ـی نیسانی 2026، مەسرور بارزانی، سەرۆکی حکوومەتی هەرێمی کوردستان لە پەیامێکدا لە تۆڕی کۆمەڵایەتیی "ئێکس" رایگەیاند "ئومێدەوارم ئاگربەستی نێوان ئەمەریکا و ئێران بەردەوام بێت و رێخۆشکەر بێت بۆ سەقامگیری و ئاشتییەکی بەردەوام لە ناوچەکەدا".

مەسرور بارزانی سوپاسی تەواوی ئەو لایەنانە دەکات کە پشتیوانییان کردوون و یارمەتیدەر بوون بۆ پاراستنی هەرێمی کوردستان.

لە بەشێکی دیکەی پەیامەکەیدا، سەرۆکی حکوومەت دووپاتی کردووەتەوە "هێرشەکانی سەر کوردستان ناڕەوا و بێ پاساو بوون. هیوادارم هەموو هێرشەکان بۆ سەر خەڵکی سڤیل و پێشمەرگە و ژێرخان و نوێنەرایەتییە دیپلۆماسییەکان کۆتاییان پێ بێت".

 سەرۆکوەزیران مەسرور بارزانی ئامادەیی هەرێمی کوردستان بۆ پشتیوانی لەو هەوڵانە دووپات دەکاتەوە کە ئامانج لێیان، کەمکردنەوەی گرژییەکان و گەیشتنە بە ئاشتیی هەمیشەیی لە ناوچەکەدا.

ئەمڕۆ چوارشەممە، 8ـی نیسانی 2026، سەرۆک بارزانی پەیامێکی لە پلاتفۆرمی ئێکس بڵاو کردەوە و تێیدا پێشوازی لە ئاگربەستی نێوان ئەمریکا و ئێران کردوو رایگەیاند؛ هەمیشە ئاشتی باشترە لە شەڕ، هەروەها هیوای خواست ئەم هەنگاوە ببێتە سەرەتایەک بۆ کۆتاییهاتنی یەکجاریی کێشەکان و چەسپاندنی ئاسایش و بەختەوەری بۆ گەلانی ناوچەکە.

ئەمڕۆ چوارشەممە 8ی نیسانی 2026، ئیمانوێل ماکرۆن، سەرۆککۆماری فەرەنسا، پێشوازیی لە رێککەوتنی ئاگربەستی نێوان ئەمریکا و ئێران کرد و جەختی لەوە کردەوە، پێویستە رێککەوتنەکە لوبنانیش بگرێتەوە.

ئیمانوێل ماکرۆن، دۆخی لوبنانی بە "هەستیار و مەترسیدار" وەسف کرد. روونیشی کردەوە، دەبێت بە شێوەیەکی تەواوەتی رێز لە خاڵەکانی رێککەوتنی ئاگربەستەکە لە سەرانسەری ناوچەکە بگیرێت.

لە بەشێکی دیکەی لێدوانەکەیدا ماکرۆن، ئاماژەی بەوە دا، راگەیاندنی ئاگربەستەکە کارێکی یەکجار باشە. ئەوەشی خستە روو، بڕیارەکەی ئێران بۆ کردنەوەی تەنگەی هورمز هەنگاوێکی ئەرێنییە.

سەرۆکی هەرێمی کوردستان پێشوازی لە رێککەوتنی ئاگربەستی نێوان ئەمریکا و ئێران دەکات و هیوا دەخوازێت، ئەم هەنگاوە ببێتە هۆی گەڕاندنەوەی سەقامگیری و بەدیهێنانی ئاشتییەکی درێژخایەن بۆ سەرانسەری ناوچەکە.

سەرچاوەیەک لە وەزارەتی کارەبا و سامانە سروشتییەکانی هەرێمی کوردستان دەستپێکردنەوەی بەرهەمهێنانی غازی لە کێڵگەی کۆرمۆر راگەیاند و ئاماژە بەوە دەدات، بڕی پێدانی کارەبای نیشتمانی زیاد دەکات و تاوەکو 12 کاتژمێری دیکە دۆخەکە بەتەواوی ئاسایی دەبێتەوە.

ئەمڕۆ چوارشەممە 08ی نیسانی 2026، دەسەڵاتی فڕۆکەوانیی شارستانیی عێراق لە راگەیەنراوێکدا، رایگەیاند، لەمڕۆوە سەرجەم فڕۆکەخانەکانی عێراق دەکرێنەوە و ئاسمانی وڵات بە رووی هاتوچۆی فڕۆکەکاندا ئاسایی دەبێتەوە.

ئەم هەنگاوە دوای ئەوە دێت لە 28ی شوباتی رابردووەوە بەهۆی ململانێ سەربازییەکانی نێوان ئەمریکا و ئیسرائیل بەرانبەر ئێران، ئاسمانی عێراق بۆ هێرشکردنە سەر یەکتر بەکاردەهێنرا. بەو هۆیەوە بڕیاری راگرتنی تەواوی گەشتە ئاسمانییەکان و داخستنی فڕۆکەخانەکان بە رووی گەشتیاراندا بۆ پاراستنی سەلامەتییان درابوو.

نووسینگەی سەرۆکوەزیرانی بەریتانیا بڵاویکردەوە، کییەر ستارمەر بە مەبەستی گفتوگۆکردن لەگەڵ هاوبەشەکانیان لە ناوچەی کەنداو سەردانی رۆژهەڵاتی ناوەڕاست دەکات، ئەوەش بۆ دڵنیابوونەوە لەوەی کە کردنەوەی گەرووی هورمز بە شێوەیەکی هەمیشەیی و بەردەوام دەمێنێتەوە، دوای راگەیاندنی ئاگربەستەکەی نێوان ئەمریکا و ئێران.

رۆژنامەی "وۆڵ ستریت جۆرناڵ" بڵاویکردەوە، 24 ئەندامی دیموکرات لە کۆنگرێسی ئەمریکا، داوای دوورخستنەوەی دۆناڵد ترەمپ، سەرۆکی ئەمریکایان لە پۆستەکەی کردووە.

ماڵپەڕی "واینت"ی ئیسرائیلی، لە زاری سەرچاوە باڵا ئەمنییەکانی وڵاتەکەیەوە بڵاویکردەوە، ئەو رێککەوتنی ئاگربەستە دوو هەفتەییەی لە نێوان ویلایەتە یەکگرتووەکانی ئەمریکا و ئێران هاتۆتە ئاراوە، راگرتنی شەڕ و پێکدادانەکانی نێوان ئیسرائیل و حیزبوڵڵای لوبنانیش دەگرێتەوە.

ئەمڕۆ چوارشەممە، 8ـی نیسانی 2026، دۆناڵد ترەمپ، سەرۆکی ئەمریکا، لە پەیامێکی نوێدا لە پلاتفۆرمی "تروس سۆشیال" گەشبینی خۆی بۆ بەدیهێنانی ئاشتییەکی گشتگیر لە ناوچەکە دەربڕی و رایگەیاند؛ "رۆژێکی گەورە بۆ ئاشتیی جیهانی" لە رێگەیە.