Ziyanên ji bombebarana êrîşa Tirkiyê encam dane

K24 – Navenda Nûçeyan

Ji ber bombebarana firokeyên şer yên Tirkiyê li ser binke û baregehên Yekîneyên Parastina Gel (YPG) û Yekîneyên Berxwedana Şingal (YBŞ) ziyaneke mezin gihêştiye wan pêgehan, li gor medyayên nêzîkî PKKê belav kirine, radyoya “Dengê Rojava” ketiye ber wê êrîşê.

Herwiha li gor zanyariyan, 5 binkeyên YBŞ li navçeyên Şingalê hatine armanckirin.

Li gor zanyariyan, di encama êrîşên li ser navçeya Qereçox de ziyanên canî bûne û hin kesan canên xwe jidest dane û û hin jî birîndar bûne.

Rêveberê Asayişa Şangalê Qasim Simo ji K24ê re ragihand, baregehên PKKê li Çiyayê Şingalê û Geliyê Kersê û li geliyê Şingalê hatin bombebarankirin.

Herwiha ragihand jî, baregeheke hêza Pêşmergeyên Kurdistanê jî bi ber wê bombebaranê ket û di encamê de 5 Pêşmerge şehîd bûn û 7 Pêşmergeyên din jî birîndar bûn.

Cîgirê Rêveberê Nexweşxaneya Firyadê ya Dihokê Dr. Ebdulah ragihand, 4 birîndar gehêştine wê nexweşxaneyê.

Ji aliyekî din ve, Berpirsê YBŞê Mezlom Şingalî ragihand, “Di encama bombebarana firokeyên Tirkiyê de şehîdek û 5 birîndarên me hene.”

Şeva borî û îro berbangê, firokeyên şer yên Tirkiyê binke û baregehên YPG û YBŞê li Başûr û Rojavayê Kurdistanê bombebaran dikin û li gor ajansên nûçeyan yên nêzîkî YPGê, 26 firokeyên şer di êrîşê de beşdar bûn.

Bombebaranê, Çiyayê Şingalê, Qerçox û 4 gundên derdora bajarê Dêrîka Rojavayê Kurdistanê kirine armanc û ligel daxuyaniyeke YPGê kuştî û birîndar hene.

Berpirsên Tirkiyê dibêjin, heta ku gefên terorê li ser Tirkiyê hebin, dê operasyon bênavber berdewam bikin û hêzên wan ji bo operasyona Iraq û Sûriyê amede ne

Derbarê bombebaranê de Hevserokê PYDê Salih Mislim ragihand, “Me pêşbînî dikir ku Tirkiye Rojavayê Kurdistanê bombebaran bike, lê pêwîst e hevpeymanên me li ser bombebarana Tirkiyê bêdeng nemînin.”