PDK û Goran tekezî li ser dariştina bernameya hevbeş dikin
Îro şanda danûstandkar a PDKê li Silêmaniyê bi Tevgera Goranê re civiya û piştî civînê her du aliyan di daxuyaniyeke hevbeş de tekezî li ser dariştina bernameyeke hevbeş ji bo pêkanîna kabîneya nû ya Hikûmeta Herêma Kurdistanê kir.
K24 – Navenda Nûçeyan
Îro şanda danûstandkar a PDKê li Silêmaniyê bi Tevgera Goranê re civiya û piştî civînê her du aliyan di daxuyaniyeke hevbeş de tekezî li ser dariştina bernameyeke hevbeş ji bo pêkanîna kabîneya nû ya Hikûmeta Herêma Kurdistanê kir.
Di daxuyaniya hevbeş de hat, şandên danûstandkar a PDKê û Tevgera Goranê ji bo guftûgokirina li ser qonaxa piştî hilbijartinên Herêma Kurdistanê û proseya pêkanîna kabîneya nû ya hikûmeta herêmê civiyan.
Di beşek din de hat, civîn di heyameke berpirsayane û bi hêviya karkirina bi hev re birêve çû û her du aliyan tekezî li gotûbêjên berdewam ji bo destnîşankirina xalên hevbeş kir û danîna karnameya kabîneya nû ya hikûmetê bi armanca başkirina jiyana welatiyan û çaksaziyên bingehîn di hemû waran de.
Berî destpêka civîna PDK û Tevgera Goranê Endamê Civata Niştimanî ya Tevgera Goranê Nesredîn Mehmûd ji K24ê re got: “Beşdariya Tevgera Goranê di kabîneya nû ya hikûmetê de ne tawan e. Lê hîna Goranê beşdarî û nebeşdariya di hikûmetê de yekalî nekiriye.”
S. B