Hikûmeta Herêmê: Bi Bexdayê re gihîştine hevtêgihîştineke baş

K24 – Navenda Nûçeyan

Peyvdarê Hikûmeta Herêma Kurdistanê Cotyar Adil ragihand, guftûgoyên di navbera Hikûmeta Herêma Kurdistanê û Hikûmeta Bexdayê ji bo gihîştina bi rêkeftineke dawî berdewam dibin û gihîştine hevtêgihîştineke baş.

Piştî bidawîbûna civîna Serokwezîrê Herêma Kurdistanê bi şanda ku ji bo danûstandinê serdana Bexdayê kiribû re, Cotyar Adil di konferanseke rojnamevanî de diyar kir, guftûgoyên di navbera Hewlêr û Bexdayê de bi rênima û serperiştiya rasterast a Serokê Hikûmeta Herêma Kurdistanê Mesrûr Barzanî berdewam e û herdu alî gihîştine hevtêgihîştineke baş.

Amaje bi wê jî da, sibe Duşemê ji bo berdewamiya guftûgoyan, şanda Hikûmeta Herêma Kurdistanê diçe Bexdayê.

Duhî şandeke hikumeta Herêma Kurdistanê serdana Bexdayê kiribû û ligel Serokwezîr û Wezîrê Petrol û Darayî Îraqê civîyabû. Îro jî Serokwezîrê Herêma Kurdistanê Mesrûr Barzanî ligel wê şandê civiyabû.

S. B