PWK û PSK salvegera damezrandina Komara Kurdistanê ya Mahabadê pîroz dikin

Diyarbekir (K24) - Partiya Welatparêzên Kurdistanê (PWK) bi zazakî û Partiya Sosyalîsta Kurdistanê (PSK) bi kurmancî bi boneya salvegera Komara Kurdistanê ya Mahabadê peyam ji raya giştî re parve kirin, di peyamanên wan de rola Komara Kurdistanê di dîroka neteweyî de girîng û hêja hat dîtin.

Di 79 ragihandina damezirandina Komara Kurdistanê ya Mahabadê de, Partiya Welatparêzên Kurdistanê bi zaravê zazakî û PSKê jî bi kurmancî peyam belav kirin.

Di peyamanên wan de bal hate kêşan ku, temenê Komara Kurdistanê kurt bû û di navçeyekê sinordarkirî da desthilatdar bû; lê belê bi armanc û kar û kiryarên xwe ve veçerxeneka dîrokî bû di xebata azadiya Kurdistanê da.

Peyamên partiyan wisa ne, Peyama Partiya Welatparêzên Kurdistanê: “Komara Kurdîstanî ercêkê neteweyî, niştimanî yê heme kurdanê dinya ya Komara Kurdîstanî bi Serekkomarîya Pêşewa Qazî Mihemedî 79 serrî verê cû roja 22.01.1946î de Meydanê Çarçirayî yê bajarê Rojhilatê Kurdistanî Mehabad de Komara Kurdistanî amey îlankerdene. A roje Meydanê Çarçirayî de temsîlkarê her çar perçeyanê Kurdistanî estbî. Komara Kurdîstanî roja 17.12.1946î de hetê Dewleta Îranî ra şîya ra.

Qazî Mihemed û 15 îdarekarê Komara Kurdîstanî roja 31ê Adara 1947î de Meydanê Çarçirayî de hetê Dewleta Îranî ra ameyî dardekerdene. Komara Kurdîstanî (Komara Mehabadî) tarîxê Kurdistanî de tecrûbeyêka zaf pîle û muhîm a ke heme Kurdîstanîyê dinya pê serberz bîyê. Cu, helwest , şexsîyet û wasîyet û pawitişnameyê Pêşewa Qazî Mihemedî yê mehkema eslê xo de raybaz û hişmendîya Kurdîstanî û armancê Komara Kurdistanî pêşkêşê ma keno. Belê, wasîyetê Pêşewa Qazî Mihemedî rayîrê azadîya her çar perçeyê Kurdîstanî de akerdo. Gama ke ma ê wasîyetî bîyare ca do ruhê Pêşewa Qazî Mihemedî, yê Mele Mistefa Barzanî, yê Seyid Riza, Îhsan Nûrî Paşa, Xalid Begê Cibrî, Şex Seîd û yê heme şehîdanê Kurdistanî şa bo. Serrgêra îlan kerdişê Komara Kurdîstanî ya 79ine de, ma Pêşewa Qazî Mihemed, Pêşewayê eskerî yê Komara Kurdistanî Mele Mustafa Barzanî û heme ronayox û kedkaranê Komara Kurdîstanî, şehîdanê Komara Kurdîstanî û heme şehîdanê Kurdîstanî bi hurmet yad kenê.

Peyama Partiya Sosyalîsta Kurdistanê: “2ê Rêbendan (22ê Kanuna Paşîn) Roja ragihandina Komara Kurdistanê li Mehabadê ye. 79 sal berê niha, di 2ê Rêbendana sala 1946an da, li bajarê Mehabadê yê Rojhilata Kurdistanê, Komara Kurdistan ji aliyê Serokê Hizba Demokrata Kurdistana Îranê (HDK-Î) Pêşawa Qazî Mehemmed ve, hate ragihandin.

Bi ragihandina Komara Kurdistanê ve gelê Kurd gihiştiye armanca xwe ya dirokî, ku bi salan bo vê kar û xebat kiriye û dike, bi dehan hezar keç û xortên Kurd bona vê armancê bûne cangorî û dibin. Belê temenê Komara Kurdistanê kurt bû û di navçeyekê sinordarkirî da desthilatdar bû. Lê belê bi armanc û kar û kiryarên xwe ve veçerxeneka dîrokî bû di xebata azadiya Kurdistanê da.

Belê Komara Kurdistanê li Mehabadê hate ragihandinê, lê belê ew Komara hemû Kurdan bû. Hemû rêxistin û kesayetî û minewerên Kurdên seranserê Kurdistanê wê Komara xwe, Pêşawa jî serokê xwe zanî, lê xudan derket û pişgirî kir.

Komara Kurdistanê nişanderê armanca bingehin a bizava azadiya Kurdistanê bû; îro jî usa ye. Ruh û viyana Komarê îro jî rêka me ronî dike. Gelê Kurd li seranserê Kurdistanê bona bi destxistina armanc û deskevtiyên Komarê kar û xebat dikin.

Îro gelê kurd ji her demê pirtir hewcedarî giyana Komar e. Baştirin şiweyê pîrozkirina Komara Kurdistanê, bona bi dest xistina armancên wê ye, kar û xebat kirin bi giyanê wê ye.

Em di 79 salvegera Komara Kurdistanê da banga hemû hêzên welatparêz dikin, ku bi giyan û ruhê Komarê tevbigerin, hevkarî û yekitiya xwe pêk bînin daku, ji zirûfa li bar a îro istifade bikin û armanca Pêşawa û hemû şehîdên Kurdistanê bi dest bixin. Komara Kurdistan Pîroz Be.