DEM Partî ji bo pêvajoya nû ya aştiyê serdana CHP û Partiya Pêşerojê dike

Navenda Nûçeyan (K24) – Şandeke Partiya Wekhevî û Demokrasiyê ya Gelan (DEM Partî) ji bo gotûbêjkirina pêvajoya nû ya aştiyê li Tirkiyê û Bakurê Kurdistanê û nirxandina qonaxa piştî 12emîn Kongreya Partiya Karkerên Kurdistanê (PKK), îro serdana Partiya Gel a Komarî (CHP) û Partiya Pêşerojê (Gelecek Partisi) dike. Ev serdan piştî hevdîtina şanda DEM Partiyê bi Rêberê PKKê Abdullah Ocalan re li Îmraliyê pêk tên.

Medyaya nêzîkî DEM Partiyê belav kirin, şandeke DEM Partiyê bi serokatiya Parlamenter û endama şanda Îmraliyê Pervîn Buldan, îro 20 Gulanê dê serdana CHPê û Partiya Pêşerojê bike. 

Armanca sereke ya van serdanan, gotûbêjkirina derfetên pêvajoyeke nû ya aştiyê li Tirkiyê û Bakurê Kurdistanê ye, herwiha nirxandina rewşa siyasî ya piştî 12emîn Kongreya Partiya Karkerên Kurdistanê (PKK) ye.

Tê payîn ku hevdîtinên şanda DEM Partiyê bi CHP û Partiya Pêşerojê re bi awayekî girtî û dûrî çavê medyayê birêve biçin.

Ev hevdîtin di çarçoveya rêzeserdanên DEM Partiyê de tên. Duh, 19.05.2025an, şanda DEM Partiyê ji bo heman armancê serdana Partiya DEVA û Partiya Saadetê jî kiribû.

Hevdîtina li Îmraliyê û Peyama Ocalan

Ev serdan û hevdîtin di demekê de tên ku roja Yekşemê, 18ê Gulana 2025an, şandeke DEM Partiyê ku ji Parlamentera Wanê Pervîn Buldan û parêzerê Rêberê PKKê Abdullah Ocalan, Fayîq Ozgur Erol pêk dihat, serdana Girava Îmraliyê kiribû û bi Ocalan re hevdîtinek pêk anîbû.

Piştî hevdîtinê, DEM Partiyê daxuyaniyek belav kiribû û tê de hatibû gotin ku Abdullah Ocalan derbarê pêwendiyên Kurd û Tirk li Tirkiyê de gotiye: "Bira şer dikin, lê yek bêyî yê din nikare. Pêwîstiya me heye ku em peymaneke nû li ser bingeha mafê biratiyê îmze bikin."