Li Silêmaniyê Pêşangeha Şêwekariyê "Azar" deriyê xwe li pêş hunerhezan vekir

Navenda Nûçeyan (K24) – Hunermendê şêwekar Mistefa Ekrem bi hevkariya xwendekarên xwe, pêşangeheke hunerî ya bi navê "Azar" li bajarê Silêmaniyê vekir. Pêşangeh, bi riya tablo û çîrokên xêzkirî (komîk), êş û janên ku mirov di jiyana rojane de li pişt maskeyan vedişêrin, tîne ziman.

Pêşangeh ji du beşên serekî pêk tê. Beşê yekem, 16 tabloyên hunermend Mistefa Ekrem li xwe digire. Ekrem di berhemên xwe de bi giranî li ser babeta "qeşmer" radiweste, ku sembola mirovê îroyîn e ku xemgînî û êşên xwe li pişt kenekî sexte vedişêre û hewl dide pakbûna xwe ya hundirîn biparêze.

Beşê duyem ê pêşangehê ji berhemên xwendekaran pêk tê. Ev xwendekar beşdarî xuleke fêrkirina hunera komîkê bûne ku ji aliyê Mistefa Ekrem ve di meha Gulanê de ji bo sê hefteyan hatiye lidarxistin. Di vê beşê de, 11 çîrokên xêzkirî yên ku ji aliyê xwendekaran ve hatine amadekirin, tên nîşandan.

Rêkxera Pêşangehê Rehben Ezet derbarê naveroka berheman de ji K24ê re got, "Tabloyên Mistefa Ekrem bi giştî behsa wê pakbûna ku di hundirê her mirovî de heye dikin, lê mirov rojane bi riya maske û makyajê êşên xwe vedişêre, da ku kes hest pê neke."

Rehben Ezet herwiha amaje bi wê yekê kir, pêşangeh wek handanekê ye ji bo wan xwendekarên ku beşdarî xula komîkê bûne û berhemên xwe pêşkêş dikin.

Pêşangeha Azar (Êş) ne tenê derbirîna hunerî ya êşên mirovî ye, lê di heman demê de platformek e ji bo piştgirîkirina nifşê nû yê hunermendên Kurd ku bi riya çîrokên xêzkirî hest û ramanên xwe tînin ziman.