ئەمریكا داوا دەكات نەمسا رۆڵی ھەبێت لە چارەسەری قەیرانی سووریا

K24 – ھەولێر:

ئەمریکا داوا لە نەمسا دەکات کە رۆڵی فراوانتری ھەبێت لە چارەسەرکردنی کێشەکانی ئێران و سووریا.

جۆن کیری وەزیری دەرەوەی ئەمریکا، لەگەڵ ھاوتا نەمساوییەکەی سەبەستیان کورز، لە واشنتن کۆبوویەوە و ستایشی رۆڵی نەمسای کرد لە میوانداریکردنی دانووستانەکانی نێوان ئێران و وڵاتانی پێنچ کۆ یەک تایبەت بە رێککەوتنی بەرنامەی چەکی ناوەکی ئێران و ھەروەھا داواشی کرد کە ھەمان رۆڵی ھەبێت لەچارەسەرکردنی قەیرانی سووریا.

ھاوكات جۆن کیری رایگەیاند: کە حکومەتی نەمسا رۆڵێکی ئاکتیڤی ھەبووە لە باوەشگرتنی ھەزاران ئاوارە و پەنابەری سووریا و عێراق و ھەڵگرتنی بەرپرسیارێتی چارەسەرکردنی قەیرانی پەنابەران لە ئەوروپا.

لەلایەن خۆیەوە وەزیری دەرەوەی نەمسا رایگەیاند: کە ئامادەن ھاوکاری ئەمریکا و وڵاتانی یەکێتی ئەوروپا بکەن بۆ زیاتر توندکردنی باری ئەمنی وڵاتانی ئەوروپا و پاراستنی ئەو وڵاتانە لە ھەڕەشەی تیرۆر.