كادیرێكی پارتی لە كەركووك تیرۆر كرا

K24 - كەركووك

شەوی رابردوو لە گەڕەکی موسەڵای شاری کەرکووك، دەستڕێژی گولـلە لە کادرێکی پارتی دیموكراتی كوردستان كرا و دوای ئەوەی گەیەندرایە نەخۆشخانە گیانی لەدەستدا.

کاوە ئەحمەد فەتحوڵڵا، بەرپرسی ناوچەی 3ی پارتی لە کەرکووك، سەبارەت بە رووداوەکە بە کوردستان 24 ی راگەیاند: "شەوی رابردوو عەبدولجەبار رەشید عارف، بەرپرسی رێکخراوی موسەڵای پارتی، لەکاتی گەڕانەوەی لە پرسەی ناسیاوێکیان لە گەڕەکی موسەڵا لەنزیک بارەگایەکی بەرەی توورکمانی و هاوکات نزیک بنکەی پۆلیسی ئازادی، دەستڕێژی گوولـلەی لێکرا و بەسەختی برینداربوو، دوای ئەوەی گەیەندرایە نەخۆشخانە ماوەی کاتژمێرێک لەژێر چاودێری پزیشكی و ئەنجامدانی نەشتەرگەری، بەهۆی سەختی برینەکەیەوە كە بوونی فیشەکێک لە ناوسەریدا بوو گیانی لەدەستداوە".

گوتیشی: "كردەوەكە تیرۆریستیە و پۆلیس لێکۆڵینەوەی لە رووداوەکە دەستپێكردووە".