به‌ وێنه‌.. ئیمپراتۆری ماده‌ی هۆشبه‌ره‌كان ده‌ستگیركرا

K24 – هه‌ولێر:

له‌ رووبه‌ڕووبوونه‌وه‌یه‌كی چه‌كداریدا، گۆزمان ئێل چاپۆ، كه‌ به‌ ئیمپراتۆری ماده‌ی هۆشبه‌ره‌كان ناسراوه‌ و به‌ ره‌گه‌ز مه‌كسیكییه‌، جارێكی دیكه‌ له‌لایه‌ن پۆلیسی ئه‌و وڵاته‌ ده‌ستگیرایه‌وه‌.

ئێل چاپۆ، به‌ر له‌ شه‌ش مانگ، توانی له‌ به‌ندیخانه‌ رابكات و خۆی بشارێته‌وه‌، به‌ڵام ئه‌مجاره‌یان له‌لایه‌ن پۆلیسی تایبه‌تی مه‌كسیك(مارینا)، له‌ ناو تونێلێكی نهێنی و تایبه‌ت بۆ خۆی ده‌ستگیركرایه‌وه‌.

تونێله‌كه‌ چاپۆ، به‌ درێژایی زیاتر له‌ یه‌ك كیلۆمه‌تر و نیو بووه‌، چه‌ندین شوێنی نهێنی و حه‌وانه‌وه‌ی به‌یه‌كه‌وه‌ به‌ستووه‌ته‌وه‌، سه‌ره‌ڕای به‌شێك له‌ چالاكی و گواستنه‌وه‌ی پاره‌ و ماده‌ هۆشبه‌ره‌كانی له‌ رێیه‌وه‌ ئه‌نجامداوه‌.

له‌گه‌ڵ ده‌ستگیركردنیشی ده‌ست به‌سه‌ر ئۆتۆمبێلی درع و چه‌ندین پارچه‌ چه‌ك و مووشه‌كدا گیراوه‌.

ئينريكى پێنا نیتۆ، سه‌رۆكی مه‌كسیك، له‌ ئه‌كاونتی تایبه‌تی خۆی له‌ تۆڕی كۆمه‌ڵایه‌تی توویته‌ر بڵاویكرده‌وه‌: "ئه‌ركه‌كه‌مان كۆتایی هات و ئێستا ئه‌ومان له‌لایه‌ن".

له‌ پرۆسه‌ی ده‌ستگیركردنی ئێل چاپۆ، له‌ شارۆچكه‌ی لۆس مۆچیس سه‌ر به‌ شاری سینالوا، پێنج كه‌س كوژران و پۆلیسێكی تیمی تایبه‌تی مه‌كسیك (مارینا) برینداربوو.

ئێل چاپۆ، جیا له‌ ماده‌ هۆشبه‌ره‌كان، بازرگانی به‌ هه‌موو ئه‌و شتانه‌ كردووه‌، كه‌ له‌سه‌ر ئاستی جیهان قه‌ده‌غه‌ن، وه‌كو قۆچی فیل و كه‌ركه‌ده‌ن، چه‌كی قورس و سووك، باڵنده‌و په‌له‌وه‌ره‌ ده‌گمه‌نه‌كان و سه‌رجه‌م جۆری ماده‌ هۆشبه‌ره‌كان.

له‌لایه‌ن پۆلیسی وڵاتانه‌وه‌ به‌ مه‌ترسیدارترین بازرگانی ماده‌ هۆشبه‌ره‌كان دانراوه‌.