زێباریی: ئەگەر هەیە کوردستان بە پشکی خۆی لە بودجەی عێراق بچێتەوە

K24

هۆشیار زێباریی، وەزیری دارایی عێراق رایگەیاند داڕمانی نرخی نەوت وا لە هەرێمی کوردستان دەکات بە پشکی خۆی لە بودجەی عێراق بچێتەوە.

هۆشیار زێباریی راشیگەیاند: "داڕمانی نرخی نەوت وا لە هەرێمی کوردستان دەکات بە پشکی خۆی لە بودجەی عێراق بچێتەوە".

بەپێی یاسای بودجەی گشتیی سای 2016ی عێراق پشکی هەرێمی کوردستان لەو بودجەیە 17%، بەو مەرجەی هەرێمی کوردستان رۆژانە 550 هەزار بەرمیل نەوتی خۆی و پارێزگای کەرکووک لە ژێر رکێفی بەغدا هەناردە بکات. بەڵام بەغدا دەڵێ بەهۆی پابەندنەبوونی هەرێمەوە ئامادە نین پشکی هەرێمی کوردستان لە بودجە رەوانەی هەولێر نکەین.

زێباریی گوتیشی: "ئەگەر هەیە دابەزاندنی بەهای دیناری عێراقیی ببێتە هۆی سەرهەڵدانی هەڵاوسان و بێکاریی، هاوکات حکوومەت ناتوانێ هەندێک رێوشوێن بگرێتەبەر، وەک زیادکردنی باج و دانانی گومرکی نوێ، چونکە ئەمە ئەبێتە بارگرانیی بەسەر هاوڵاتیانەوە".

وەزیری دارایی عێراق ئاماژەشی کرد کە: "ئاماژەی دڵخۆشکەر هەن بۆ چاکبوونی نرخەکان لە وەرزی بەهار هاوکات لەگەڵ کەمبوونی قەبارەی بەرهەمهێنانی نەوتی لیتەیی گران بەها لە ئەمریکا".

هۆشیار زێباریی ئەوەشی خستەڕوو: "هۆکاری بەردەوامبوونی بەرهەمهێنەرانی نەوتی لیتەیی بریتیە لەوەی کە ئەوان بە بۆندی پێشوەختە و بە نرخی 70 دۆلار و ئەم بۆندانە لە وەرزی بەهاری داهاتوو کۆتاییان دێ".

زێباریی هاوکات پێشبینی کرد: "ئێران نەتوانێ بە خێرایی بەرهەمی نەوتی خۆی زیاد بکات وەک دەخوازێ"، و پێشبینی کرد: "بەرهەمی نەوتی ئێران لە کۆتایی ئەمساڵدا رۆژانە لە 500 هەزار بەرمیل تێنەپەڕێ".

وەزیری دارایی عێراق راشیگەیاند کە: "ئەوەی پێشینەیە لە خەرجییەکانی حکوومەت مووچەی فەرمانبەران و خانەنشینکراوان و پرۆسە سەربازییە پێویستەکانە بۆ رووبەڕووبونەوەی رێکخراوی (داعش)، لە پاڵ خزمەتگوزاریی تەندروستیی و کۆمەڵایەتیی بنەرەتیی".

ئەمە لە کاتێکدایە حکوومەتی عێراق لە بودجەی گشتیی ساڵی 2016 نرخی بەرمیلێک نەوتی خاوی بە 45 دۆلاری ئەمریکیی خەمڵاندووە، بەڵام زێباریی دەڵێ: حکوومەت "هەوڵدەدات خەرجییەکانی کەمبکاتەوە و لە نێوخۆ قەرز بکات بۆ پڕکردنەوەی کورتهێنانی بودجە".

بەپێی چاودێران پێشبینی دەکرێ کورتهێنانی بودجەی گشتیی سای 2016ی عێراق بگاتە نزیکەی 24 ترلیۆن دیناری عێراقیی، واتا نزیکەی 25%  تێکرای بودجەی عێراق.

سەرچاوە: رۆیتەرز