حكوومه‌تی عێراق: دانه‌وه‌ی قه‌رزه‌كان دواده‌خرێت

K24  ـ هه‌ولێر:

ئه‌نجوومه‌نی وه‌زیرانی عێراق به‌ سه‌رۆكایه‌تی حه‌یده‌ر عه‌بادی سه‌رۆك وه‌زیران، ئه‌مڕۆ سێشه‌ممه‌ 9/2/2016 كۆبوونه‌وه‌ی ئاسایی ئه‌نجامدا و چه‌ند بڕیارێكی ده‌ركرد.

یه‌كێك له‌ بڕیاره‌كان، په‌سه‌ندكردنی پێشنیازی لیژنه‌ی كاروباری ئابووری بوو سه‌باره‌ت به‌ دواخستنی دانه‌وه‌ی قه‌رزه‌كان و ئه‌و زیاده‌یه‌ی ده‌كه‌وێته‌ سه‌ری له‌ بانكه‌ حكوومیه‌كاندا.

ئه‌نجوومه‌نی وه‌زیرانی عێراق بڕیاریشیدا: "بۆ گۆڕینی چه‌ند فڕۆكه‌یه‌كی نه‌فه‌رهه‌ڵگر، كۆمپانیای هێڵی ئاسمانی عێراق  پاشكۆی گرێبه‌سته‌كه‌ی له‌گه‌ڵ كۆمپانیای بۆینگ ئیمزابكات، بۆ ئه‌وه‌ی بارگرانی له‌سه‌ر گه‌نجینه‌ی ده‌وڵه‌ت كه‌مبكاته‌وه‌.

سه‌رۆك وه‌زیرانی عێراق حه‌یده‌ر عه‌بادی رایگه‌یاند:حكوومه‌ته‌كه‌ی تێڕوانینێكی روونی هه‌یه‌ بۆ رووبه‌ڕووبوونه‌وه‌ی قه‌یرانی دارایی و داوای له‌ لایه‌نه‌ سیاسیه‌كان كرد هاوكاربن له‌وباره‌یه‌وه‌".

عه‌بادی له‌ كۆبوونه‌وه‌كه‌دا ئاماژه‌ی بۆ ئه‌وه‌شكرد: "پێویسته‌ سه‌رجه‌م وه‌زاره‌ت و دامه‌زراوه‌ فه‌رمییه‌كان، خه‌رجییه‌كانیان كه‌مبكه‌نه‌وه‌ و  گه‌شتی فه‌رمی بۆ ده‌ره‌وه‌ی وڵات ئه‌نجامنه‌درێت ته‌نیا بۆ كاری زۆر پێویست نه‌بێت".