راگەیەندراوێک لە وەزارەتی پەروەردەی حکومەتی هەرێمی کوردستانەوە

K24 – هه‌ولێر:

به‌شی راگەیاندنی وەزارەتی پەروەردە، راگه‌یه‌ندراوێكی له‌ باره‌ی پرۆسه‌ی خوێندن و ره‌وشی كۆرۆنا بڵاوكرده‌وه‌.

له‌ راگه‌یه‌ندراوه‌كه‌دا، هاتووه‌: "دوای هەڵسەنگاندنی دۆخی تەندروستی لە لیژنەی باڵای بەرەنگابونەوەی  ڤایرۆسی کۆرۆنا، کە ئاماژە بە مەترسیداریی تەشەنەسەندن و هەڵکشانی بەردەوامی ڤایرۆسی کۆرۆنا دەکات  لەهەرێمی کوردستان، خوێندنی ئەلیکترۆنی و ئۆنلاین بەردەوام دەبێت و وەزارەتی پەروەردە پرۆگرامی هەردوو وەرزی خوێندن بۆ قوتابیان و خوێندکاران پوخت دەکاتەوە  و تەنها ئەو بابەتانە داخڵ دەبن بۆ تاقیکردنەوەکانی کۆتایی ساڵی خوێندن کە پێش مانگی تەموز ئەنجام دەدرێن بۆ قۆناغی(1ی بنەرەتی تا 11)ـی ئامادەیی".

هه‌روه‌ها هاتووه‌: "ئێمە وەکو وەزارەت لە هەماهەنگی بەردەوام دەبین لەگەڵ وەزارەتی تەندروستی سەبارەت بەخوێندنی ناوپۆل لەپاش جەژنی رەمەزانی پیرۆز  کە لیژنەی باڵا بڕیاریداوە لە پێناو بەردەوامبوونی پرۆسەی خوێندن چەندین رێککاری دیکە لە کەرتی گشتیی و تایبەت و شوێنە گشتییەکان بگیرێتەبەر ، تا ئەوکاتە پێویستە بەتەواوی پابەندبوون و سوود وەرگرتن لە وانەکان بە شێوازی ئەلیکترۆنی و ئۆنلاین  و کەناڵی تەلەڤزیۆنی  پەروەردەیی هەبێت هەموو ئەگەرەکان لەبەرچاوبگیرێت".