سەرۆك بارزانی پێشوازی لە پارێزگاری دیوانیە دەكات 

K24 – هه‌ولێر:

پێشنیوەڕۆی رۆژی پێنجشەممە 20ـی ئایاری 2021 لە سەلاحەددین سەرۆك مەسعود بارزانی پێشوازی لە زهێر ئەلشەعلان پارێزگاری دیوانیە كرد.

لە دیدارەكەدا بارودۆخی سیاسیی عێراق و رەوشی ژیانی خەڵك لە پارێزگای دیوانیە و پارێزگاكانی تری عێراق تاوتوێ كرا و جەختیش لەسەر پەیوەندییە مێژووییەكانی نێوان گەلی كوردستان و دانیشتوانی پارێزگاكانی باشووری عێراق كرایەوە.

هەر لەو دیدارەدا پارێزگاری دیوانیە پێزانینی هەبوو بۆ بووژانەوە و پێشكەوتنەكانی هەرێمی كوردستان و خوازیاری ئەوە بوو كە پارێزگای دیوانیە سوود لە ئەزموونەكانی هەرێمی كوردستان وەربگرێت.