3 هه‌زار پێشمه‌رگه‌ی رۆژئاڤا ئاماده‌ن بگه‌ڕێنه‌وه‌

K24 – هه‌ولێر:

فه‌رمانده‌ی له‌ شكری رۆژی رۆژئاڤای كوردستان رايگه‌ياند، ئه‌وان ئاماده‌ن بگه‌ڕێنه‌وه‌ بۆ رۆژئاڤاى كوردستان به‌ مه‌به‌ستى شه‌ڕكردن دژی داعش و پاراستنی ناوچه‌ كوردییه‌كان، به‌ڵام په‌یه‌ده‌ رێگه‌یان پێ نادات.

عه‌مید محه‌ممه‌د ره‌جه‌ب ده‌عدۆ فه‌رمانده‌ی  له‌شكری رۆژ له‌ لێدوانێكدا به‌ رۆژنامه‌ی واشنتن پۆست-ی راگه‌یاند له‌ شكری رۆژئاڤا  3 هه‌زار پێشمه‌رگه‌ی مه‌شقپێكراوی هه‌یه‌ كه‌ ئاماده‌ن بگه‌ڕێنه‌وه‌ رۆژئاڤا و به‌رگری له‌ كوردی ئه‌و پارچه‌یه‌ بكه‌ن له‌به‌رامبه‌ر داعش، به‌ڵام په‌یه‌ده‌ رێگه‌یان پێنادات.

فه‌رمانده‌ی له‌شكری رۆژ ده‌ڵێت: "ئێمه‌ ئێستا به‌ ناچاری له‌ هه‌رێمی كوردستان نیشته‌جێین، به‌ڵام له‌گه‌ڵ ئه‌وه‌شدا به‌شداری چه‌ندین شه‌ڕمان كردووه‌ له‌ دژی چه‌كدارانی داعش به‌تایبه‌تی له‌ شنگال و میحوه‌ری وانكێ".

محه‌ممه‌د ره‌جه‌ب ده‌عدۆ ئاماده‌یی خۆشی ده‌ربڕی بۆ كاركردنی هاوبه‌ش له‌گه‌ڵ هێزه‌كانی یه‌په‌گه‌، له‌و باره‌یه‌وه‌ گوتى: "بڕیاربوو ئۆپه‌راسیۆنی هاوبه‌ش بكه‌ین له‌گه‌ڵ يه‌په‌گه‌ به‌ سه‌رپه‌رشتی ئه‌مه‌ریكییه‌كان، به‌ڵام دواتر له‌ سه‌ر چۆنیه‌تی به‌رێوه‌بردنی هێزه‌ هاوبه‌شه‌كه‌ نه‌گه‌یشتینه‌ رێككه‌وتن".