به‌ وێنه‌.. زانيوته‌‌ گه‌لێك هه‌يه‌ له‌سه‌ر وشكانى ناژين

K24 – هه‌ولێر:

له‌ كه‌ناراوه‌كانى ماليزيا گه‌لێك ژيان به‌سه‌ر ده‌به‌ن، كه‌ هاووڵاتييه‌كانيان جگه‌ له‌سه‌ر رووى ئاو، ناتوانن له‌ وشكانييدا ژيان به‌سه‌ر به‌رن.

له‌ برى فێربوونى زمان و زانسته‌كان، منداڵانى گه‌لى باجاو هه‌ر له‌ منداڵييه‌وه‌ فێرى راوى ماسى و مه‌له‌ كردن و درووستكردنى تۆڕى راوكردن و يه‌خت و به‌له‌مى بچووك و ناسينى زينده‌وه‌ره ئاوييه‌كان ده‌كرێن.

ماڵپه‌ڕى ده‌يلى مه‌يلى بريتانى بڵاويكردووه‌ته‌وه‌، ئه‌و گه‌له‌ له‌ ته‌نكايى كه‌ناراوه‌كاندا ژيان به‌سه‌ر ده‌به‌ن و له‌سه‌ر رووى ئاوه‌كه‌وه‌ ده‌توانن ژێر كه‌ناراوه‌كان ببينن و ئه‌وه‌ش يارمه‌تيده‌ريانه‌ بۆ راوكردنى زينده‌وه‌ره‌ ئاوييه‌كان.

ئه‌و گه‌له‌ رووبه‌ڕووى كێشه‌يه‌ك بوونه‌ته‌وه‌، ئه‌ويش به‌ هۆى هۆگربوونيان به‌ ته‌نكايى كه‌ناراوه‌كانه‌وه‌ منداڵه‌كانيان ناتوانن له‌ وشكايى ژيان به‌سه‌ر به‌رن و ناچارن هه‌ر له‌سه‌ر رووى ئاو بمێننه‌وه‌.

ئه‌وان هاوشێوه‌ى ماسى به‌ بێ ئاو ناژين، ئه‌گه‌ر چى هه‌ندێكجار پێويستيان به‌وه‌يه‌ بۆ گونده‌ نزيكه‌كان بچن و پێداويستييه‌كانى خۆيان بكڕن، به‌ڵام خۆيان دواناخه‌ن و به‌ په‌له‌ ده‌گه‌ڕێنه‌وه‌ بۆ سه‌ر رووى ئاوى كه‌ناراوه‌كان.

له‌ ئه‌زموونێكى كه‌موێنه‌دا وێنه‌گرى ماليزيايى نگ چۆ كياى ته‌مه‌ن 43 ساڵ سه‌ردانى ئه‌و كۆمه‌ڵگه‌ دابڕاوه‌ى كردووه‌ و ژماره‌يه‌ك وێنه‌ى سه‌رنجڕاكێشى له‌ باره‌ى ژيانى ئه‌و گه‌له‌وه‌ تۆماركردووه‌. له‌و رێگه‌يه‌وه‌ توانيويه‌تى يه‌كه‌م ئه‌ڵقه‌ى په‌يوه‌ندى له‌ نێوان ئه‌و گه‌له‌ و گه‌لانى سه‌ر رووى زه‌وى درووستبكات.

چۆ كيا، رايگه‌ياندووه‌، گه‌لى باجاو كۆمه‌ڵێك په‌نابه‌رن له‌ فليپينه‌وه‌ روويانكردووه‌ته‌ ماليزيا و به‌ هۆى نه‌بوونى ره‌گه‌زنامه‌وه‌ ناتوانن بچنه‌ ناو ئه‌و وڵاته‌وه‌ و ئه‌وه‌ش ناچاريكردوون له‌ كه‌ناراوه‌كان بمێننه‌وه‌ و ژيان له‌سه‌ر رووى ئاو بووه‌ته‌ تاكه‌ رێگه‌ى مانه‌وه‌يان.

باسى له‌وه‌شكردووه‌، گه‌لى باجاو زۆر به‌ قوڵى تێكه‌ڵى مانا و ده‌لاله‌ته‌كانى ئاو بوونه‌ و تا ئه‌و راده‌يه‌ بۆ كاتژمێر و زانينى كات و وه‌رزه‌كان هه‌ر له‌ رێگه‌ى سه‌رنجدان له‌ جوڵه‌ى ئاو و ديارده‌ى هه‌ڵكشان و داكشانه‌وه‌ ده‌زانن كات چه‌ند تێپه‌ڕيوه‌ و چۆن به‌سه‌ر ده‌چێت و به‌ وردى هه‌ژمارى كات به‌ خوله‌ك ده‌كه‌ن ته‌نيا له‌ رێگه‌ى ئاوه‌وه‌.

ئه‌وان به‌ گه‌وره‌ى و بچووكه‌وه‌ رژدن له‌سه‌ر راوكردن له‌ ده‌ريادا و ته‌نانه‌ت ده‌توانن بۆ قوڵايى 20 مه‌تر له‌ ژێر ئاودا راو بكه‌ن.

منداڵه‌كانيشيان هاوشێوه‌ى باوانيان ده‌توانن راو بكه‌ن و هه‌ندێكجار به‌ توندوتيژى راوده‌كه‌ن و خۆراكى خۆيان په‌يدا ده‌كه‌ن.