یانەی زاخۆ یاریزانێکی پێشووی لالیگا دەباتە ریزەکانی

K24- هه‌ولێر:

یانەی زاخۆ لەگەڵ "محەمەد فاتاو" یاریزانی پێشووی لالیگا گەیشتووەتە رێککەوتن بۆ وەرزی داهاتووی خولی نایابی عێراق گرێبەستی لەگەڵ دەکات.

محەمەد فاتاو، یاریزانی تەمەن 28 ساڵانی غانی، کە پێشتر لە لالیگا لە ساڵانی 2011 تا 2016 بۆ ماوەی پێنج ساڵ یاری بۆ یانەکانی گرانادا، رایۆ ڤاییکانۆ، ئەلمێریا و کادێز کردووە، بۆ ماوەی وەرزێک پەیوەندیی بە یانەی زاخۆ دەکات و ئەمڕۆ بەشداریی راهێنانی یانەکەشی کرد.

محەمەد فاتاو، کە لە هێڵی ناوەڕاست یاریی دەکات، نزیکبوو پەیوەندیی بە یانەی نەجەف بکات، بەڵام بەهۆی نەگونجانی لەگەڵ کەشی باشووری عێراق پەشیمان بووەوە یاری بۆ ئەو یانەیە بکات.

فاتاو، پێشتر یاریی بۆ یانەی غازی عەنتابی تورکی و قادسیە و کوەیتی کوەیتی کردووە و وەرزی رابردوو لەگەڵ یانەیەکی هیندی یاریی دەکرد.