په‌یوه‌ندییه‌كانی ده‌ره‌وه: هیوادارین هاووڵاتیانى هەرێمى کوردستان نەبنە قوربانى دەستى قاچاخچىیه‌كان
"ئێمە ئاگادارى بارودۆخى سەختى ئەوانین لە سەر سنوورەکان"
K24- هه‌ولێر:
به‌رپرسی په‌یوه‌ندییه‌كانی ده‌ره‌وه‌ی حكومه‌تی هه‌رێمی كوردستان لەگەڵ باڵیۆزى بیلارووسیا لەعێراق و تورکیا باسىیان لە بارودۆخى سەختى پەنابەرە کوردەکان سه‌ر سنووری بیلارووسیا و پۆڵۆنیا، کرد.
فه‌رمانگه‌ی په‌یوه‌ندییه‌كانی ده‌ره‌وه بڵاویكرده‌وه، سەفین دزەیى بەرپرسى فەرمانگەی ناوبراو، لەگەڵ ڤیکتۆر ریباک، باڵیۆزى بیلارووسیا بۆ عێراق و تورکیا کۆبووەوە.
راشیگه‌یاند، هەردوولا تیکشیان خستە سەر میکانیزمى زیاتر پەرەپێدانى پەیوەندییەكان و بوارەکانى بازرگانى و ئابوورى و وەبەرهێنان.
جه‌ختیكرده‌وه سه‌ر بارودۆخى سیاسى عیراق و ناوچەکە و هەوڵەکان بۆ پێکهێنانى حکومەتى تازەى عیراق و دیالۆگى نێوان لایەنە سیاسیەکان و پەیوەندییەکانى نێوان هەولێرو بەغدا کرا.
روونیكرده‌وه، باردۆخى سەختى پەنابەرە گیرخواردووەکانى سنوورى نێوان بیلاڕووسیا و پۆڵۆنیا و لیتوانیا، تەوەرێکى ترى دیدارەکە بوو، لەم رووەوە سەفین دزەیى جەختى کردەوە کە ئەوان لە هەماهەنگى بەردەوامن لەگەڵ لایەنە فەرمییەکانى ئەو وڵاتانە بۆ ئەوەى هاووڵاتیانى هەرێمى کوردستان نەبنە قوربانى دەستى قاچاخچى و ژیانیان پارێزراو بیت.
باڵیۆزی بیلارووسیا له عێراق و توركیا گوتى: ئێمە ئاگادارى بارودۆخى سەختى ئەوانین لە سەر سنوورەکان، هیوادارین حکومەتى ئەو وڵاتانە ئاسانکارى تەواو بکەن بۆ ئەوانەى دەیانەوێت ئارەزوومەندانە بگەڕێنەوە.
