رۆژنامەوانێكی ئەمریکی کوژرا

K24 - هه‌ولێر:

رۆژنامەوانێكی ئەمه‌ریکی، بە ناوی دەیڤد گیلکی و وەرگێڕە ئەفغانییەکەی لەکاتی چوونییان بۆ پارێزگای ھیلمەند، لە باشووری ئەفغانستان بەمەبەستی رووماڵکردنی شەڕی نێوان تاڵیبان و سوپای ئەفغانستان، لە نزیك سنووری ئەو پارێزگایە کوژران.

بەگوێرەی زانیارییەکان، ئەو رۆژنامەوانه‌ ئەمریکییە لەگەڵ وەرگێڕەکەی لە ئۆتۆمبێلێکی سەربازی ئەمریکی جۆری ھامەردا بوونە، کاتێك تەقەیان لێکراوە و کوژراون.

میدیا ئەمریکییەکان ئاشکرایان کرد کە ئۆتۆمبێلەکەی رۆژنامەوانه‌ ئەمریکییەکە کەوتووەتە نێو بۆسەیەکی چه‌كدارانی تاڵیبانەوە و شۆفێری ئۆتۆمبێلەکەش کوژراوە.

گیلکی یەکێکە لە رۆژنامەوانه‌ بەناوبانگەکان لە ئەفغانستان و رۆڵێکی باڵای ھەبووە لە رووماڵکردنی جەنگی ئەفغانستان لە ماوەی ١٥ ساڵی رابردوودا.