به ڤیدیۆ.. سهرۆك بارزانی و مستهفا كازمی كۆبوونهوه
پڕۆسەی سیاسی عێراق و تەحەددیات و دەرفەتەکانی تەوەرێکی دیكهی ئەو دیدارەبوون
K24 – هەولێر:
سەرۆك مەسعود بارزانی، ئهمڕۆ دووشەممە (14ی ئادار/ مارسی 2022) لە سەلاحەدین پێشوازی لە مستەفا کازمی، سەرۆك وەزیرانی عێراق و شاندێکی یاوەری کرد، کە پێکھاتبوون لە فوئاد حوسێن، وەزیری دەرەوە و جومعە عیناد، وەزیری بەرگری و عوسمان غانمی، وەزیری ناوخۆی حکومەتی فیدراڵ و ژمارەیەک بەرپرسی باڵای ئەمنی و سیاسی حکومەتی عێراقی فیدراڵ.
لە دیدارەکەدا، کە مەسرور بارزانی، سەرۆکی حکومەتی ھەرێمی کوردستان و رێبەر ئەحمەد، وەزیری ناوخۆی حکومەتی ھەرێم ئامادەیی بوون، سەرۆك وەزیرانی عێراق ھاوخەمی و ھاوسۆزی خۆی بۆ خەڵکی ھەرێمی کوردستان و شاری ھەولێر بە سەرۆك بارزانی گەیاند، بۆ ئەو ھێرشە مووشەکییەی کە کرایە سەر شاری ھەولێر و بە کارێکی تێکدەرانە و دەستدرێژی بۆ سەر تەواوی عێراق وەسف کرد.
ھەروەھا سەرۆک وەزیرانی عێراق ئەوەشی ئاشکرا کرد، کە لیژنەیەکی تایبەت بۆ دەرخستنی راستییەکانی ئەو رووداوە و رەواندنەوەی چەواشەکاریەکان پێکھێنراوە.
ھەر لەو کۆبوونەوەیەدا ھەردوولا بیروڕایان لەبارەی ھۆکار و دەرھاوێشتەکانی پەلاماری مووشەکی سەر ھەولێر ئاڵوگۆر کرد و جەخت لە ھەماھەنگی و کاری ھاوبەشی ھەردوولا بۆ پاراستنی سەقامگیری ھەرێمی کوردستان و عێراقی فیدراڵ کرایەوە.
پڕۆسەی سیاسی عێراق و تەحەددیات و دەرفەتەکانی ناو پڕۆسەی سیاسی عێراق تەوەرێکی دیكهی ئەو دیدارەبوون.
مستەفا کازمی، سەردانی ئەو ناوچە نیشتەجێبووانەی هەولێر دەکات، کە بەرەبەیانی 13ی ئەم مانگە کەوتوونەتە بەر هێرشی مووشەکی بالیستی.