لە سلێمانی تەقە لە ئەنجومەنی سەركردایەتی پارتی كرا

K24 – هەولێر:

كەمێك پێش ئێستا لە شاری سلێمانی تەقە لە بارەگای ئەنجومەنی سەركردایەتی پارتی دیموكراتی كوردستان كراوە و لە ئەنجامدا پاسەوانێكی بارەگاكە بریندار بووە.

پەیامنێری كوردستان 24 لە سلێمانی ڕایگەیاند" تەقە لە بارەگای ئەنجومەنی سەركردایەتی پارتی كراوە و بەپێی زانیارییە سەرەتاییەكان، تەقەكەرەكان بە دوو ئۆتۆمبێل لە سایدی ئەوبەری بارەگاكەوە تەقەیان كردووە و ڕایانكردووە، و لە ئەنجامدا پاسەوانێكی بارەگاكە فیشەك بەر ڕانی كەوتووە و بریندار بووە.

بەپێی زانیارییەكانی پەیامنێری كوردستان 24، تا ئێستا ئەو تەقەكەرانە دەستگیر نەكراوون و پاش ئەوەی تەقەیان لە بارەگاكە كردووە، بەرەو دەرەوەی شاری سلێمانی هەڵاتوون.

لەبارەی ڕووداوەكەشەوە تا ئێستا هیچ دەزگایەكی فەرمی ئەمنی ئەو شارە ڕوونكردنەوە و زانیاری لەوبارەیەوە ڕانەگەیاندووە.

لە ماوەی ڕابردوودا چەندین جار لە شاری سلێمانی تەقە لەبارەگای ئەنجومەنی سەركردایەتی پارتی دیموكراتی كوردستان كراوە و تا ئێستا هیچ كەسێك لەسەر تەقەكردن لەو بارەگایە، كە دەكەوێتە سەر ڕێگای سەرەكی سلێمانی-كەركوك، دەستگیر نەكراوە.