به‌ وێنه‌.. موسڵمانانى جيهان جه‌ژن پيرۆز ده‌كه‌ن

K24 – هه‌ولێر:

ئه‌مڕۆ له‌ يه‌كه‌م رۆژى جه‌ژنى ره‌مه‌زاندا، له‌ زۆرينه‌ى كۆمه‌ڵگه‌ موسڵمان نشينه‌كانى جيهاندا، مه‌راسيمى نوێژى جه‌ژن و پيرۆزبايى له‌ يه‌كدى كردن به‌ڕێوه‌چوو.

جه‌ژنى ره‌مه‌زان يه‌كێكه‌ له‌ دوو جه‌ژنه‌ سه‌ره‌كييه‌كى جيهانى ئيسلام و دواى مانگێك له‌ رۆژووگرتن موسڵمانان رۆژوويان ده‌شكێنن و مه‌راسيمى تايبه‌ت به‌ جه‌ژن ئه‌نجامده‌ده‌ن.

مه‌راسيمه‌كه‌ به‌ وێرده‌ ئاينييه‌كان و ئه‌نجامدانى نوێژ و وتارى ئاينى جه‌ژن ده‌ستپێده‌كات و له‌ ميانه‌يدا موسڵمانان پيرۆزبايى له‌ يه‌كدى ده‌كه‌ن و ئاشتى و ته‌بايى نێوانيان قوڵتر ده‌كه‌نه‌وه‌.

ئه‌مساڵ جيا له‌ ناوچه‌كانى ديكه‌ى كۆمه‌ڵگه‌ ئيسلامييه‌كان له‌ گه‌ڕه‌كى كه‌ڕاده‌ى به‌غداى پايته‌خت له‌ كه‌شێكى ماته‌مينيدا هاووڵاتيان مه‌راسيمى نوێژى جه‌ژنيان ئه‌نجامدا و له‌ ميانى مه‌راسيمه‌كه‌دا نزايان بۆ گيانى قوربانيانى ئه‌و ته‌قينه‌وه‌ تيرۆريستييه‌ كرد، كه‌ له‌م هه‌فته‌يه‌دا له‌ رێگه‌ى ئۆتۆمبێلێكى بۆمبڕێژكراوه‌وه‌ روويدا و له‌ ئاكاميدا 250 هاووڵاتى گيانيان له‌ده‌ستدا و زياتر له‌ 300 هاووڵاتى ديكه‌ بريندار بوون.

هاووڵاتيان له‌ دواى ئه‌نجامدانى نوێژ و مه‌راسيمى جه‌ژن ده‌ستيانكرد به‌ خۆپيشاندان و داوايانكرد، هه‌رچى زووه‌ به‌رپرسانى ئه‌و كرده‌وه‌ تيرۆريستييه‌ بدۆزرێنه‌وه‌ و رووبه‌ڕووى لێپرسينه‌وه‌ى ياسايى بكرێنه‌وه‌.