عەلی حوسێن: پەیامی سەرۆک بارزانی بۆ یەكڕیزی و تەبایی ناوخۆی هەرێمی کوردستان و عێراق بوو
K24 - هەولێر:
بەرپرسی مەکتەبی رێکخستنی پارتی لە سلێمانی و هەڵەبجە و راپەڕین رایگەیاند، پەیامی سەرۆک بارزانی پەیامێکی گشتگیر بوو، هەم بۆ یەکڕیزی و تەبایی لایەنە سیاسییەکان لە ناوخۆی هەرێمی کوردستان، هەم بۆ رێککەوتنییان لەگەڵ بەغدا.
ئەمڕۆ پێنجشەممە (11ــی ئایاری 2023) عەلی حوسێن، بەرپرسی مەکتەبی رێکخستنی پارتی لە سلێمانی و هەڵەبجە و راپەڕین، لەمیانەی بەشداریکردنی لە رێورەسمی کردنەوەی یادگه‌ی نیشتمانیی بارزانی، بە کوردستان24ــی راگەیاند، پەیامی سەرۆک بارزانی پەیامێکی روون بوو لەسەر ئاستی عێراق، بۆ یەکڕیزی و تێگەیشتن و هەماهەنگی، لەنێوان هەرێمی کوردستان و بەغدا بۆ چارەسەرکردنی کێشەکان نێوانییان.
هەروەها راشیگەیاند، سەرۆک بارزانی پەیامێکی ئاراستەی ناوخۆی هەرێمی کوردستانیش کرد، کە بە یەکڕیزی و یەکگرتوویی دەتواندرێت هەنگاوی گەورە بهاوێژرێت و دەستکەوتی گەورەش بەدەستبهێندرێت.
سەبارەت بە پەیامەکەی سەرۆک بارزانی بۆ لایەنە سیاسییەکانی هەرێمی کوردستان، عەلی حوسێن گوتی، سەرۆک مەسعود بارزانی، داوای کرد بۆ چارەسەرکردنی کێشەکان کۆبوونەوەکی گەورە سازبکەین و ئەو هەلومەرجە سیاسییەی ئێستای هەرێمی کوردستانیش وادەکات، هەموو لایەک پێکەوە کۆببنەوە و گرفتەکان چارەسەربکەن.
ئەمڕۆ پێنجشەممە (11ـی ئایاری 2023)، سەرۆک بارزانی لەمیانی گوتارێکدا لە رێورەسمی کردنەوەی یادگەی نیشتمانی بارزانی پەیامێکی ئاراستەی لایەنە سیاسییەکانی هەرێمی کوردستان کرد و داوای لێکردن لاپەڕەیەکی نوێ هەڵبدەنەوە و گوتی، بە دژایەتیکردنی یەکتری کەس هیچی دەستناکەوێت.
سەرۆک بارزانی لە پەیامەکەیدا، داوای لە هەردوو مەکتەبی سیاسیی پارتی و یەکێتی کرد کۆببنەو بۆ کۆتایی هێنان بە کێشەکان و ئامادەکاری بکەن بۆ کۆبوونەوەی فراوانی لایەنەکان پێش 18ـی مانگ لەپێناو گەیشتن بە رێککەوتن و لێکتێگەیشتنی هاوبەش.