واشنتن: هێشتا داعش هه‌ڕه‌شه‌یه‌كی جددیه
K24 – هەولێر:
ئەمه‌ریکا کوژرانی 8 چەکداری داعش و دەستگیرکردنی 31ی دیکەی راگەیاند. ده‌شڵێت: هێشتا داعش هه‌ڕه‌شه‌یه‌كی جددیه.
سوپای ئەمه‌ریکا، ناسراو بە سێنتکۆم، لە راگەیێندراوێکدا ئاماری ئۆپەراسیۆنەکانی مانگی ئایاری بڵاوکردەوە و ئاشکرای دەکات، 21 ئۆپەراسیۆنی هاوبەشیان لە عێراق کردووە.
له ئۆپه‌راسیۆنه‌كاندا 11 چه‌كداری داعش ده‌ستگیركراون و شه‌شی دیكه‌ش كوژراون.
هەر لە راگەیه‌ندراوەکەی سوپای ئەمه‌ریکادا هاتووە: له مانگی ئایار 17 ئۆپه‌راسیۆنی هاوبه‌شمان له سووریا ئه‌نجامداوه و بەهۆیەوە 20 چه‌كداری داعش ده‌ستگیركراون و دووی دیكه‌ش كوژراون.
سوپای ئەمه‌ریکا جەختیش دەکاتەوە، وێڕای لاوازبوونی، به‌ڵام هێشتا داعش له ناوچه‌كه‌دا هه‌ڕه‌شه‌یه‌كی جددیه لە ناوچەکەدا و له‌گه‌ڵ هاوپه‌یمانه‌كانمان پابه‌ندین له هه‌وڵه‌كانمان بۆ له‌ناوبردنی داعش.
لەدوای ئازادكردنی عێراق لە 2003دا لەلایەن هێزەکانی ئەمه‌ریکا و هاوپەیمانانیەوە، ئەبو موسعەب زەرقاوی رێکخراوی ئەلقاعیدەی لە عێراق راگه‌یاند، ئەلقاعیدە له عێراق، به‌تایبه‌ت ناوچە شیعەنشینەکاندا هێرشی ئەنجامدەدا، بەهیوای ئەوەی کە پێکدادانی تایفیی لەعێراقدا سه‌رهه‌ڵبدات.
ساڵێک بەرلە دروستکردنی ئەو رێکخراوە، زەرقاوی لەگەڵ هەزاران چەکدار و خۆبەخشی توندڕەودا بۆ عێراق هات، بەمەبەستی ئەوەی لەدژی ئەمه‌ریکی و بەریتانییەکان و هێزەکانی دیکەی هاوپەیمانی ئەو دوو وڵاتە، بجەنگێت.
زه‌رقاوی بووە کەسێکی ناسراو لەسەر ئاستی جیهان، دوای ئەوەی کۆڵن پاوڵ، وەزیری پێشووی دەرەوەی ئەمه‌ریکا، لە گوتارێکدا لە نەتەوەیەکگرتووەکان لە ساڵی 2003، ناوی هێنا.
لە 7ـی حوزەیراندا، زەرقاوی لە هێرشێکی ئاسمانی هێزەکانی ئەمه‌ریکادا کوژرا، ئەبو ئەیوب ئه‌لمه‌سڕی جێگەی گرتەوە. مه‌سڕی رێکخراوی دەوڵەتی ئیسلامیی عێراقی دروستکرد، و ئەبو عومەر ئەلبەغدادی وەکو سەرکردەی نوێی ئەو رێکخراوە دەستنیشانکرد.
له نیسانی 2010 ئەبو عومەر ئەلبەغدادی و مەسڕی لەهێرشێکی هاوبەشی هێزەکانی ئەمه‌ریکا و عێراقدا کوژران و ئەبوبەکر ئەلبەغدادی بووە سەرۆکی نوێی رێکخراوی دەوڵەتی ئیسلامیی عێراق.
له نیسانی 2013 بەغدادی رایگەیاند، گروپەکەی بۆ دەوڵەتی ئیسلامیی لە عێراق و شام(داعش) گۆڕیوە، ئەوەش لەدوای ئەوە هات کە جەبهەتولنوسرەی لەخۆگرت، کە بە بەرەی نوسرە ناسرابوو و سەربە ئه‌لقاعیدە بوون.
له کانوونی یەکەمی 2014 داعش کۆنترۆڵی رەقەی سووریای کرد و وەکو پایتەختی دەوڵەتەکەی رایگەیاند.
له شوباتی 2014 ئەلقاعیدە پەیوەندییەکانی خۆی لەگەڵ داعش پچڕاند، لەدوای ئەوەی پێکدادانی ناوخۆیی لەنێوان بەرەی نوسرە و داعش روویدا.
له حوزەیرانی 2014 لەیەکێک لە هێرشە گەورەکانی داعشدا، ئەو رێکخراوە کۆنترۆڵی مووسڵ و تکریتی کرد.