مه‌سعود باتێلی: هه‌موو ئاماده‌كارییه‌ك بۆ پێشوازیكردن له زیاره‌تكارانی چله‌ی ئیمام حوسێن كراوه
K24 - هەولێر:
ئاماده‌كارییه‌كان بۆ پێشوازیكردن له سه‌ردانیكاران و زیاره‌تكارانی شیعه به بۆنه‌ی چله‌ی ئیمام حوسێن له ده‌روازه سنوورییه‌كانی هه‌رێمی كوردستان ده‌ستیان پێكردووه، هاوكات سه‌رۆكی لیژنه‌ی باڵای ئاماده‌كاری رایده‌گه‌یه‌نێت، پرۆسه‌ی پێشوازیكردن نزیكه‌ی 20 رۆژ به‌رده‌وام ده‌بێت.
ئه‌مڕۆ (سێشه‌ممه 15ـی ئابی 2023) مه‌سعود باتێلی، سه‌رۆكی لیژنه‌ی باڵای ئاماده‌كاری تایبه‌ت به كوردستان24 رایگه‌یاند، حكومه‌تی هه‌رێمی كوردستان بۆ پێشوازیكردن له زیاره‌تكارانی شیعه، لیژنه‌یه‌كی باڵای له سه‌رجه‌م وه‌زاره‌ت و لایه‌نه په‌یوه‌ندیداره‌كان پێكهێناوه و كاره‌كانیان ده‌ستپێكردووه.
هه‌روه‌ها ئاماژه‌ی به‌وه كرد، بۆ ئه‌و مه‌به‌سته چوار وێستگه دانراوه، كه دوو وێستگه‌یان سه‌ره‌كین و یه‌كێكیان ده‌كه‌وێته ده‌روازه‌ی حاجی ئۆمه‌ران، ئه‌وی دیكه‌یش له پێشانگای نێوده‌وڵه‌تی حاجی ئۆمه‌ران دانراوه، هاوكات له‌گه‌ڵ دوو وێستگه‌ی لاوه‌كی كه یه‌كێكیان ده‌كه‌وێته كانی ماران و ئه‌ویدیكه‌یشیان ده‌كه‌وێته بازگه‌ی شێراوه.
سه‌رۆكی لیژنه‌ی باڵای ئاماده‌كاری باسی له‌وه‌شكرد، بۆ ئه‌مساڵ 500 هه‌زار كه‌س له رێگه‌ی ده‌روازه‌ی حاجی ئۆمه‌رانه‌وه سه‌ردانی شوێنه پیرۆزه‌كانی نه‌جه‌ف و كه‌ربه‌لا له باشووری عێراق ده‌كه‌ن، روونیشیكرده‌وه، پرۆسه‌كه له 18ـی ئاب ده‌ستپێده‌كات و تاوه‌كو چله‌ی ئیمام حوسێن له 6ـی ئه‌یلوول به‌رده‌وام ده‌بێت.
مه‌سعود باتێلی سه‌رنجی بۆ ئه‌وه‌ش راكێشا، كه رۆژانه له كۆی ئه‌و 500 هه‌زار كه‌سه، 25 هه‌زار له رێگه‌ی حاجی ئۆمه‌رانه‌وه سه‌ردانی عێراق ده‌كه‌ن بۆ ئه‌وه‌ی بچنه شاره‌كانی نه‌جه‌ف و كه‌ربه‌لا، گوتیشی، بۆ ئه‌و مه‌به‌سته 55 گێتیان بۆ پاسپۆرت داناوه، به‌م شێوه‌یه له یه‌ك كاتدا 55 كه‌س مۆری پاسپۆرتیان بۆ لێ ده‌درێت و به‌یه‌كه‌وه داخڵی ناو خاكی هه‌رێمی كوردستان ده‌بن.
ساڵانە، ژمارەیەکی زۆری شیعە مەزھەب لە ناوچەکانی دیکەوە بە پیادە ڕوو دەکەنە شاری کەربەلای باشووری عێراق بۆ ئەوەی لە رێوڕەسمی چلەی ئیمام حوسێن بەشداری بکەن، بەشێک لەو زیارەتکارانەش لە رێگەی هەرێمی کوردستانەوە دەچنە کەربەلا.
پێشتر عەبدولئەمیر شەممەری، وەزیری ناوخۆی عێراق رایگەیاندبوو: "پێشبینی دەکەین، ئەمساڵ سێ تا پێنج ملیۆن زیارەتکار لە وڵاتانی عەرەبی و ئێرانەوە بۆ بەشداریکردن لە رێوڕەسمی چلەی ئیمام حوسێن لە دەروازە سنوورییەکانی زرباتییە، شەلامجە، مونزەرییە، شیب، سەفوان سەردانی عێراق بکەن.
