ئەستێرەیەکی تیکتۆک لەسەر خواردنی گۆشتی بەراز سزای دوو ساڵ زیندانی بۆ دەردەچێت
K24 - هەولێر:
ئەستێرەیەکی تیکتۆک لە ئیندۆنیزیا لەسەر خواردنی گۆشتی بەراز لەیەکێک لە ڤیدیۆکانیدا، سزای دوو ساڵ زیندانیکردنی بۆ دەردەچێت.
لینا لوتفیاواتی، ئەستێرە و (ئینفلوێنسەر) کارتێکەرێکی نێو تۆڕە کۆمەڵایەتییەکانە لە ئیندۆنیزیا و بە ملیۆنان کەس بینەری ڤیدیۆکانین.
لینا لە مانگی سێی ئەمساڵ لە یەکێک لە ڤیدیۆکانیدا گۆشتی بەرازی تاقیکردووەتەوە و ئەمەش کاردانەوە و تووڕەیی گەلی ئیندۆنیزیای لێکەوتووەتەوە کە زۆرینەی موسڵمانن.
لە ناوەڕاستی ئەم هەفتەیە لەسەر سکاڵای پارێزەرێک بەناوی ساپریادی سامسودین، لینا دادگایی کرا و بەتۆمەتی "کوفرکردن" سزای دوو ساڵ زیندانی و پێبژاردنی 16 هەزار و 269 دۆلاری بەسەردا سەپێندرا.
لە شەریعتی ئیسلامدا، گۆشتی بەراز یەکێکە لە خواردنە حەرامکراوەکان و لە ئیندۆنیزیای زۆرینە موسڵمان، ئەو خواردنە لە موسڵمانان قەدەغە کراوە.
ژمارەی دانیشتوانی ئیندۆنیزیا نزیکەی 275 ملیۆن کەسە و سەدا 90ـی موسڵمانن.
لینا لە لێدوانێکیدا بۆ رۆژنامەنووسان گوتی: لەسەر ئەو رەفتارەم زیاتر لە چەند جارێک داوای لێبوردنم کردووە، دەزانم ئەوەی کردوومە هەڵەبووە، بەڵام چاوەڕێم نەدەکرد سزاکەم دوو ساڵ زیندانی بێت.