دهۆک .. فێستیڤاڵێکی تایبەت بە بەرهەمی جووتیاران لە بەرواری باڵا بەڕێوەدەچێت
K24 – دهۆک:
گوتەبێژی فێستیڤاڵی بەرواری باڵا لە کۆنفرانسێکی رۆژنامەوانی رایگەیاند، ئامادەسازی تەواو کراوە بۆ فێستیڤاڵەکەیان کەوا بڕیارە لە 25 تا 27ـی ئەم مانگە لە گوندی بریفکای دەڤەری بەرواری باڵای پارێزگای دهۆک ئەنجام بدرێت.
رۆژی دووشەممە (23ـی تشرینی یەکەمی 2023) فەهمی باڵەیی، گوتەبێژی فێستیڤاڵی بەرواری باڵا رایگەیاند، هەموو جووتیارانی دەڤەرەکە و جووتیارانی ناوچەکانی دیکەی هەرێمی کوردستان و پارچەکانی دیکەی کوردستان داوەتکراون بۆ بەشداریکردن لەو فێستیڤاڵە و نمایشکردنی بەرهەمەکانیان.
فەهمی باڵەیی ئاماژەی بەوەشکرد، ئەم فێستیڤاڵە دەرفەتێکی گرنگە بۆ ناسینی بەرهەمی جووتیارانی ناوچە جیاوازەکان و خستنە بازاڕی بەرهەمەکانیان لە ناوخۆ و دەرەوەی وڵات.
لەبارەی فێستیڤاڵەکەوە، فەهمی باڵەیی گوتیشی، فێستیڤاڵی بەرواری باڵا لەژێر چاودێری عەلی تەتەر، پارێزگاری دهۆک بەڕێوەدەچێت وەک بەشێک لە هەوڵەکانی حکومەتی هەرێمی کوردستان بۆ ساغکردنەوەی بەرهەمی جووتیاران و راکێشانی سەرنجی وەبەرهێنەران بۆ بەرهەمی ناوخۆیی جووتیاران.