پێشانگایەکی شێوەکاری بۆ قوتابییانی پەیمانگای هونەرە جوانەکانی هەولێر کرایەوە
K24 – هەولێر:
دوای 10 ساڵ لە وەستانی فێستیڤاڵی پەیمانگای هونەرە جوانەکانی هەولێر، ئەمساڵ جارێکی دیکە فێستیڤاڵەکە بە چەند بڕگەیەکی هونەری بەڕێوەدەچێت.
لە یەکەم چالاکیی فێستیڤاڵەکەشدا پێشانگایەکی شێوەکاری بە چەندین تابلۆی رەنگین و کاری سیرامیکی و پەیکەرتاشی لە هۆڵی رۆشنبیری جیهان کرایەوە.
تابلۆکانی ئەم پێشانگایە گوزارشتیان لە جوانی ژنانی کورد و بوێرییان دەکرد لە کاری هەرەوەزیدا لەگەڵ پیاواندا، هەروەها قوتابییانی پەیمانگای هونەرە جوانەکان پەیکەری چەند کەسایەتییەکی گەورەی بواری رۆشنبیری و ئەدەبیان نمایشکرد، دیارترینشیان پەیکەری پیرەمێردی شاعیر بوو، کە رۆڵێکی بەرچاوی بینیووە لە بزاڤی هونەر و رۆشنبیری کوردی دا.
رێباز محەممەد، سەرۆکی بەشی شێوەکاری پەیمانگاکە بۆ کوردستان24 گوتی: لە پێشانگاکەماندا هەوڵمانداوە سەلیقەی جوانی ئەو قوتابییە بەهرەمەندانە نمایشبکەین، کە ساڵانێکە عەشقی داهێنانن لە هونەری شێوەکاری و سیرامیک و پەیکەرتاشی دا، بۆیە ئەمڕۆ دەرفەتێکی باش بوو قوتابییان توانیان بەهرەکانیان نیشانی ئامادەبووانی پێشانگاکەیان بدەن.
.jpeg)
