ئاوات شێخ جه‌ناب: هەوڵەکان بە ئاراستەی هەموارکردنەوەی یاسای بودجەی عێراق بەردەوامن
K24 – هەولێر:
وه‌زیری دارایی و ئابووری رایده‌گه‌یه‌نێت، هەوڵەکان بە ئاراستەی هەموارکردنەوەی یاسای بودجەی عێراق بەردەوامن. گوتیشی: "به‌هیواین بەیەک پێوانە مامەڵە لەگەڵ مووچەخۆرانی هەرێم وەک تێکڕای مووچەخۆرانی پارێزگاکانی دیكه‌ی عێراق بکرێت".
ئاوات شێخ جه‌ناب وەزیری دارایی و ئابووری حكومه‌تی هه‌رێمی كوردستان، له‌سه‌ر پرسی گفتوگۆكانی نێوان هه‌ولێر و به‌غدا رایده‌گه‌یه‌نێت، هەوڵەکانیان بە ئاراستەی هەموارکردنەوەی یاسای بودجەی عێراق بەردەوامن و بەو هیوایەی بتوانن بۆ ساڵی داهاتوو پرسی مووچەی فەرمانبەران لەهەموو کێشە و ململانێیەک دوور بخەنەوە و بەیەک پێوانە مامەڵە لەگەڵ مووچەخۆرانی هەرێم وەک تێکڕای مووچەخۆرانی پارێزگاکانی دیكه‌ی عێراق بکرێت.
وه‌زیری دارایی پابەندی ئەنجوومەنی وەزیرانی هه‌رێمی كوردستان و وەزارەتە پەیوەندیدارەکانی بۆ خەرجکردنی شایستەی کۆمپانیا ناوخۆیی و بیانییه‌كانی دوپاتکردەوە و رایگەیاند، بە چارەسەربوونی کێشە سیاسیەکانی نێوان هەرێمی کوردستان و حکومەتی فیدراڵی کە کێشەی گەورەی ئابووری و دارایی قورسی بۆ هەرێمی کوردستان دروستکردووە، کێشەی سەرجەم کۆمپانیا بیانی و ناوخۆییەکان چارەسەر دەبن.
ئه‌و گوتانه‌ی وه‌زیری دارایی له‌میانه‌ی پێشوازییان له نه‌سروڵڵا ره‌شنوودی كونسوڵی گشتی كۆماری ئیسلامی ئێران له‌هه‌ولێر ئاماژه‌ی بۆ كراوه.