ئاهەنگ ئەنوەر جەباری: بە سەربازییکردنی شاری کەرکووک رادەگرین
K24-هەولێر:
کاندیدێکی پارتی دیموکراتی کوردستان بۆ هەڵبژاردنی ئەنجوومەنی پارێزگاکان لە شاری کەرکووک دووپات لەوە دەکاتەوە، پرسی بە سەربازیکردنی شاری کەرکووک رادەگرن و پارێزگارێکی کورد بۆ شارەکە هەڵدەبژێرن.
ئەمڕۆ یەکشەممە ( 10 ی کانوونی یەکەمی 2023)، ئاهەنگ ئەنوەر جەباری کاندیدی پارتی دیموکراتی کوردستان بۆ هەڵبژاردنی ئەنجوومەنی پارێزگاکان لە کەرکووک بە کوردستان24 ی راگەیاند: هەڵکردنی ئاڵای کوردستان لە کەرکووک لە چوارچێوەی ماددەی 140 ی دەستووری عێراقی، یاساییە لەهەر شوێنێک هەڵبکرێت جگەلە فەرمانگە حکومیەکان.
لەبارەی ئەو ساڵانەی هەڵکردنی ئاڵای کوردستان لە شارەکە قەدەغە کرابوو، ئاهەنگ ئەنوەر گوتی: چەند ساڵە ئەو لایەنەی کەرکووکی فرۆشت و دای بە هێزە عێراقییەکان، هیچ بەرگرییەکی لە خەڵکی کەرکووک و کوردستانیان نەکرد لە کاتی بەرزکردنەوەی ئاڵای کوردستان، بۆیە ئەو پرسە بە نایاسایی باس کرابوو.
پێشی وابوو،پرسی هەڵکردنی ئاڵای کوردستان پرسێکی سیاسیە و یاسایی نیە، ناتوانرێ قەدەغە بکرێت.
لەبارەی هەڵبژاردنی ئەنجوومەنی پارێزگاکانیش لە شاری کەرکووک، ئەو کاندیدەی پارتی ئاماژەی بەوە کرد، ئەو هەڵبژاردنە بۆ کەرکووک چارەنووسساز و یەکلاکەرەوەیە، ئەمجارە بەو پێیەی یاسای ئەنجوومەنی پارێزگای کەرکووک هەمووار کرایەوە، هەموو دەسەڵاتەکان لە ئەنجوومەنی پارێزگا دەبێت و هەموو بابەتەکانی کەرکووک هەر لە کەرکووک یەکلا دەبێتەوە و،دەسەڵاتی رەها بە ئەنجوومەنەکە دەدرێت لە پرسی دانانی پارێزگار و یەکە ئیدارییەکان و بودجە و ئاسایش و پەروەردە و بابەتەکانی دیکە.
ئاهەنگ ئەنوەر ئاشکرای کرد، ئەنجوومەنی داهاتووی پارێزگای کەرکووک سێ ئەرکی هەیە، لەوانەش دەرکردنی یاسا و چاودێریی و خزمەتگوزاریی بۆ خەڵک، بەڵێنیشی بە کەرکووکیەکان دا پرسی بە سەربازیکردنی شاری کەرکووک کە پێچەوانەی یاسایە، هەموو توانایەکی بۆ بخەنە گەڕ دژی بووەستنەوە رایگرن، گوتیشی: دۆسێی ئەمنی شاری کەرکووک دەدەینەوە دەست هێزە ئەمنییەکان و پۆلیس، بە پێویستی زانی زۆرترین پۆلیس کورد بێت بەو پێیەی کورد پێکهاتەی یەکەمی شارەکەیە.
لەبارەی ئەجندا و پلانی پارتی، ئاهەنگ ئەنوەر گوتی: ئێمە وەکو پارتی دیموکراتی کوردستان، شەڕی ناسنامە و کوردستانی بوونی کەرکووک دەکەین، هاوکات نەخشەی ئیداری ئەو شارە بە بڕیاری زۆرینەی دەنگی ئەنجوومەن دەگۆڕین.
کاندیدەکەی پارتی گەشبینی خۆی نیشاندا لەوەی بڕیاری دانانی پارێزگاری کەرکووک لەلایەن پارتیەوە دەبێت، گوتی: هەرچەند پارتی خۆی لە کەرکووک نەبووە، بەڵام بڕیارەکانی کاریگەری لەسەر دانانی کەسە یەکەمەکانی یەکە ئیداریەکانی ئەو شارەدا هەبووە.
کارزان حەیدەر
